意大利餐



迷你 Arancini



Twice cooked duck

朱古力布甸


蘇格籣鬼佬朋友前幾日又請我吃西餐,今次是今年第六次,都唔知點講啦,呢間是意大利餐,以前開在皇冠賭場,後來搬到市中心現址,每天晚上都差不多滿座,tripadvisor 評語都不錯,事實上墨爾本的意大利餐隨了意大利本土之外公認最好的,而且有一條街 Lygon st.該區有小意大利之稱,整條街都是意大利餐廳.吃完呢餐後佢仲話下次請我吃一間以塔斯曼尼亜Tasmania 生蠔海鲜出名的西餐,呢間所有海鲜都是從塔斯曼尼亜空運來喎.

過兩天就是聖誕節,在此順祝各位聖誕快樂,身体健康.


 

 

西班牙餐



Field muschroom 饟帶子

水晶三文魚



佢又走去櫃面埋單

前幾日鬼佬朋友又請我吃西班牙餐,今年己經是第五次,都唔知點樣講,唔去佢又失望,去嗎次次都係佢埋單,而且次次都是西餐,食得多西餐都厭,有次我問佢不如轉下口味,試下其它國家的餐啦,好似泰國印度都合鬼佬口味,中餐仲正,唔信睇下全世界有邊度冇中餐?好多鬼佬一試就鍾意,一試便知龍與鳳,佢話唔試,獨沽一味西餐至死不渝.

熱氣球

準備升空啦

日出

右上角的公路向前開車大约幾分鐘後就到我住的那區了

墨爾本市

朋友剛剛whats app佐十幾張他們坐熱氣球的照片給我睇,他兩夫妻今天早上五時多在市中心集合,熱氣球公司派旅遊巴載送去坐熱氣球升空的地方,升空後環繞墨爾本一個圈,全程约一個小時,可以見到日出,市中心和海港,坐完後有車送去市中心的一間酒店吃免費早餐,費用每人460澳元約2600港元,每次最多只能搭載十名乘客,本地人較多遊客較少,因為要睇天氣,風太大有雨不能升空,熱氣球公司已經取消了他兩次,改期到今早才能順利升空,你話啦,如果遊客是不是要改機票等坐?他說熱氣球內裡有些嘈,燒火的聲音,而且有些冷要穿多些衣服,但我從未坐過熱氣球,將來有機會或者會試下。

韓式 BBQ

韓式薯餅

牛尾湯

前幾日睇到 Stella 姐介紹韓式BBQ燒烤,想起個多月前的一天晚上,我和老妻小女三人也是去唐人街叫大長今的一間韓式BBQ,對上一次去呢間大約是七年多前,那時候剛開張不久,人很多要排隊等位,而我們上個月晚上則見到大把位,不過飲食生意很難說,或者下次再去時有可能爆滿要等位,呢度同香港不同,燒烤用的不是爐,是一塊鐵板斜放,鐵板尾有一條小坑,燒烤後的油流向小坑,侍應又幫你燒幫你剪,而且所有侍應清一色都是韓國人.

我一生人第一次吃韓式燒烤是30多年前在漢城,依家改叫首爾,當時坐飛機由紐约飛香港,坐在我旁邊的一位香港人,閒聊時他告訴我坐大韓航空可以在漢城免費停留,叫我到逹漢城机場時更改機票順道停留兩天,他帶我去明洞租酒店,當年韓國還有宵禁,好似晚上十一時至第二天早上六時,第二天晚上他請我吃韓式燒烤,所有的肉和菜都是他叫,仲有一支叫真露的酒,入口酒精度非常高印象十分深刻.

西班牙餐

頭盆黑毛豬火腿

頭盆辣腸仔

slow cook pork belly 慢焗豬腩

西班牙海鮮飯

甜品

甜品

甜品

佢又走去櫃檯埋單

今晚鬼佬朋友又請我吃西班牙餐,今年已經是第四次啦,他前幾日打電話給我說星期二來墨爾本晚上去吃西班牙餐,佢怕我到時唔得閒,所以預早打電話約定,我說唔去得唔得?佢話我唔去當然得,不過佢會感到十分失望,去就去啦.呢個世界上有好多野是無法解釋的,隨了說人结人緣之外,也不知道能說些甚麼?

打邊爐

滿座

又巧合同上次一様價錢

前日早上我一對夫妻朋友從Brisbane來到,晚上請他們去打邊爐,我老妻小兒小女和他們都喜歡打邊爐,世事就是如此巧合,幾年前我們一家人返香港,他們請我們到沙田稻香打邊爐,他老婆更要排隊粒幾鐘等位,未來之前他仲問我要不要等位?我話放心啦,呢度唔同香港而且又不是週末肯定大把位,因呢間我半年前來過,當晚見唔到有乜客人,但前天晚上就完全相反,全部坐滿,我冇訂檯要等半個多小時才有位,經理同我說唔好意思,今晚都唔知點解會有咁多客人,要我們等候咁耐,真係出乎我意料之外,無言.

朋友只得一粒女,幾年前來澳洲讀大學,讀的是醫院管理,讀完返香港打了一年多工,可能己經習慣了澳洲的生活,再回來辨理居留申請,可惜不獲批準,焗住要再讀碩士課程,朋友兩夫妻每隔幾個月就來探望她,每次回程返香港順道來搵我吹下水,我們相識相交數十載,往事歷歷在目,交友交心莫嫌貧富高低,君乘車,我擔泥,他日相逢下車揖,我騎馬,君行路,他日相逢為君下.


http://ngwai.blogspot.com.au/2016/03/blog-post_18.html

好撒馬利亜人

尋日早上下大雨,能見度非常低

天雨路滑一不小心好容昜出意外

昨天早上返工時經過高速公路,下大雨能見度非常低,下午放工回家時,雖然雨已經停了,不過天雨路滑,途中已經見到兩單交通意外,之前的一單是輕微碰撞,但呢一單就大單啦,撞路邊而四輪朝天,我見到有幾人停車去救援,扶出來的是一位中年鬼婆,好彩冇乜事,見她坐在地上滿臉驚慌,美國和加拿大有一條法例叫"好撒馬利亜人法" Good Smaritan law 是自願去救援別人免除法律上的責任,鼓勵旁觀者施以援手而不用擔心因傷亡而遭到追究 ,呢條法例出自聖經路加福音,耶蘇對撒馬利亜人做好事的比喻.

說起好撒馬利亜人,呢件事件發生在耶路撒冷去馬撒大附近的一個小地方,景點只是一間小酒店,基本上冇乜野睇,一般本地一日遊都不會去,只有自駕遊才會在途中經過,我明年初去以色列本想計劃租車自駕遊去馬撒大和死海,途中會經過,不過我睇過老表的窮遊網介紹,以色列租車取和交車都好麻煩,耶路撒冷搵車位又不容易,而且又不能開入巴勒斯坦,所以要考慮下租不租車.

一年容易又中秋,明天是中秋節,祝各位有一個偷快的中秋節.

圖書館

有八卦週刊

有借書証者可免費上網一小時

溫習室

電子遊戲機

將俄羅斯西伯利亜鐵路旅遊書借回家參考

圖書館過對面馬路有一越南飽店

好多時午餐一杯越南咖啡一條越南紮肉飽

剛開張當日去參觀借書,都唔知自己咁好彩抽到有獎品

獎品都算唔錯,有戲票,購物券,餐飲代用券,
罐頭,朱古力,意粉,蕃茄醬,圖書等.

每個星期六如果我有空,都會去我家附近的一間圖書館,離我家幾分鐘車程,步行大概要半粒鐘,呢間圖書館是新開的,就是原地將舊的拆掉,從新再起過,如此就花去了二年時間,上個月才重新開放,整棟大廈有好多層,圖書館佔兩層,設備不錯,有學生溫習室,上網室,電子遊戲機,衛星電視,小孩玩樂中心,而且仲有大量中文書,也有三幾本中文週刊和越文書,30多年前澳洲佬心態睇唔起有色人種,想都不敢想會有中文書越文書,依家時代不同,表叔財大氣粗,連機場都有使用普通話播放通告,新年仲有中文揮春,老表你係得既.

說起圖書館又使我想起自由行時,行路經過碰到有圖書館也會進去參觀見識一下,印象中最靚最好的是新西蘭首都威靈頓市中心的一間,幾層高面積好大,電梯上三樓,有一排排座椅靠窗口,一望無際的海景,遠眺Oriental Bay 海天一色風光如畫.美國南三藩市火車站出口向左轉直行可到纜車總站,沿途經過一間圖書館,內裡面積细少,可能近市中心的關係,今年三月停新架坡時,離唐人街不遠有一大型商場,頂樓的一層是圖書館,認真不錯購物完可以睇書休息,藏書亦相當多. 30多年前我去中美洲多明尼加玩時,住了成個月,問朋友邊度有圖書館?佢話都住佐幾年,唔係我問起圖書館,好似唔多覺有圖書館喎.

尋日借了幾本書回家,其中一本是聖彼德堡,另外一本俄羅斯西伯利亜鐵路遊,用來參考和規劃一下行程,可以由北京出發西去經蒙古或滿洲里到莫斯科再去聖彼德堡,也可以從海參威到莫斯科,亦可以相反方向從莫斯科東來北京或海參威,比較多人選擇由莫斯科出發,因為可以白天經過貝加爾湖 Lake Baikal,最近呢幾日我真係非常好彩,炒港股期指期權差不多執夠我和老妻兩人由墨爾本到香港和莫斯科的機票,感謝天主希望再行好運,執埋兩人包廂火車票和酒店食宿就太好了.