一個舊籌碼的故事 9

今早睇到行路人的博文講http://wayfarershk.blogspot.com.au/2013/12/2.html#more,她們一團人除咗歐美等國,揸特區護照和 BNO,有簽証都不能入境尼加拉瓜,又使我想起在多明尼加和朋友跟四日巴士團到鄰國海地入境時的遭遇有些相似,只不過我地比入境佢地唔比入境,海地是西半球最貧窮落後的國家,跟巴士團晚上開車,大概旅行社想慳番一晚酒店,差不多半夜就到,以下是我在她的博留言,不過我自己都留有 copy 所以貼出比大家睇下.


''太陽底下無新事，你們今次的經歷不知算不算新事？裴濟Nadi機場十時後移民官走哂，自由出入，我都去過幾十個國家，差不多卅年前多有一次從多明尼加共和國的首都Santo Domingo 跟團去海地太子港Port Au Prince的幾天巴士團，海地是西半球最貧窮最多文盲的國家，好似晚上七時或八時，是吃完晚餐時出發，差不多三更半夜到逹邊境過関，然後每人拿自己的行李排隊過移民局，只有一位似移民官的人，坐在一張又殘又舊的木書枱上檢查護照，當時一團有成廾多人，排咗成粒幾鐘條龍郁都唔郁，好似完全冇人過関，真係感到奇怪，走去問領隊，原來是海地政府規定每一個人過関他都要打電話去查問請示，但係唔知打去邊度問，和去問邊個？不過我那次極不好彩，原來電話壞咗，個個罰企，佢老兄坐係到抽煙，一陣又行去飲水，行來行去，我唔講你都唔會知到乜嘢叫過関，乜嘢叫移民局，原來屋頂上面是鐡皮搭建，四邊空空通風，同豬欄冇乜分別，幾枝光管，旅客冇椅座，站得倦就學表叔，痞低，都唔知等咗幾耐，最少有五至六粒鐘，個廁所亦不分男女，邊個先入邊個用，用星鐵皮包住木門挖個坑冇得鎖，只能虛掩，等到天都光晒，又口喝又肚餓，終於見到有一位似高官的人前來，在每人護照蓋入境印的旁邊簽個字，謝天謝地終於順利過関。去到市中心時見到有女人頭上頂住一盤水，好似香港以前搪瓷的洗臉盆，有人買時就放在地下，拿出小膠杯裝滿，個位飮完個膠杯仔又交還給她，晩上的節目是參觀巫師表演鬼上身跳舞驅鬼轉運，叫voodoo.''

一個舊籌碼的故事 8

這是他13年前來澳洲玩時給我的鐘錶店咭片

網友 Shu 兄講我身邊的人都幾淒酸,落後地方的景况就如六十年代的香港.,今日又講下卅多年後仍然有聯系的幾位朋友中的一位.


記得朋友帶我去他的鐘錶店介紹我認識他時,進入店內見到一位肥佬如彌勒佛一樣,光頭赤著上半身露出一個大肚腩,穿著一條短褲和人字拖鞋在修理手錶,奇怪不奇怪,在自己的店做生意光著上身,大概只有落後的地方才會見到,他姓蔡,名就單字松,一見面就攞出一枝香煙比我,我話唔抽煙,跟住又攞枝细啤酒出來,我話唔飲酒,又問我識唔識打麻雀?有些人天生喜歡講嘢,不停的同我講他以前在香港的舊事,他說1970年未移民多明尼加之前曾在九龍巴士公司做過售票員,又在媽媽奶汽水廠做跟車送貨員,傾談下知道他大過我幾年,當年佢行年快三拾,在香港從未識過女仔從未拍過拖.傾談仲未完他叫朋友和我唔好走啦,今晚去他妹夫家裡吃晚飯,我話唔好意思唔想去,他說唔緊要,他每天晚上收工就後去他妹夫那裡吃晚飯跟住打番幾圈麻雀,他妹夫開麵包工廠.前鋪後居.


到了他妹妹和妹夫的麵包工廠,見到廠房面積好大,約有萬幾呎,他妹夫見到他帶我們來吃晚飯,非常客氣,又再整多幾樣餸菜出來,那次是第一次見他的妹夫,亦是唯一的一次,他妹夫上次想和他一起來澳洲玩,到了香港後,証件出麻煩拿不到澳洲簽証,我想請他吃番餐都冇機會啦,因他五年前仙遊了.


年多後他返香港,他約我出來飲茶,他說同細妹借咗幾千美元,加上自己一些積畜,返香港準備結婚,親戚朋友介紹咗好幾個女仔比他相睇,冇一個鍾意他,這也難怪,山卡喇小國多明尼加貧窮落後,地圖上揾都好難揾到,人地真係要嫁都嫁去美加澳紐,心想而且你老兄的面貌同身型揾到才奇怪,我話不如返大6台山揾啦,佢話算啦唔揾啦,訂咗下星期機票走人.世事命運就是如此,他走之前幾日有人介紹一位女仔比他相睇,人結人緣呢位女仔對他有意思,他說要改機票.

果樹



紅蘋果





青蘋果



蜜桃

西梅

布霖梅

 

無花果

梨

杏

 

我家後花園種咗好多果樹,每棵最少都有十年,其中以梅,蜜桃和杏最甜,無花果和梨最差冇乜用只能攞嚟煲湯.青紅蘋果,梅,杏,蜜桃,桃駁梨等都好容昜種,只要每年冬眠時修剪一下枯枝,春天時在樹中心外半米圍住圓圈施肥一至二次.

 

貪字變個貧

尋日下午和朋友到呢個商場 high tea ,見到呢間店,忽然想起一單新聞,呢間售賣彩票的特約商店,位於我家附近的商場內,店主夫婦是香港移民, 2000年以30多萬澳元買來經營,我每次經過見到生意都不錯,好多人買彩票,不過我好耐都冇買彩票, 因以前買過三幾次,一次都冇中過,所以唔再買,但我老婆每星期都買,上個月她跟我說,奇怪啦點解唔見佢地開檔做生意?我話佢地夫婦二人可能返香港或去其它地方旅行,我老婆話唔會,若佢地唔得閒開檔,會揾人幫忙睇檔,以前都試過架.

前幾日睇本地報紙先鋒太陽報 herald sun的一段新聞報導 ,原來上個月有一位老鬼婆拿著一張彩票比佢 check ,佢 check完話中咗獎,獎金7000元,因為電腦出咗問題,顯示唔到出嚟,老鬼婆收咗支票入咗户口,過幾日同家人講起,家人 check 到,冇可能7000元獎金,是32000元多,跟住報警,夫婦比差佬拉咗,依家週身蟻,等法庭判决。

我成日教我仔女,做人千萬不要做違法的事,一次好彩,並不表示次次都會好彩,若要人不知,除非己莫為.

鳥巢

鳥巢

今日下午想採摘一些桃駁李送比朋友,因太多食唔晒,無意中見到遠處有一個鳥巢,我用梯爬高睇下有乜嘢,見到三粒淺藍色鳥疍,拍比大家睇下,都唔知乜嘢鳥? 

聖誕快樂

大阪和歌山

一年容昜又聖誕,我去過十幾個國家過聖誕節,最冇聖誕气氛的要算是花旗的洛杉磯,完全一 d 氣氛都冇,最好气氛還是韓國,她雖然不是天主教國家,但平安夜在街上見到好多年青人唱聖詩和報佳音,香港尖東有燈飾,到處有聖誕大餐吃, 呢2張相是多年前去日本過聖誕時拍的,漫天風雪算有些聖誕气氛,在此衷心祝願各位網友,有一個平安愉快的聖誕節.

一個舊籌碼的故事 7

這是成龍的親筆簽名

講起成龍想起好多往事,大约20年前多些,我和我老婆去日本,在啓德機場登機閘口等候上機時見到他,我老婆問我有冇一張白紙,我問拿來做乜? 她說拿去比成龍簽名,冇呀,拿張10蚊紙比佢簽,我老婆話佢肯唔肯簽呀? 放心啦,百幾人都冇一人個搵佢簽,佢唔簽我簽.


Stella 姐留言'成龍講過的野都要經理人同佢「善後」架' ,好似上次又話中國人是要比人管的,這也難怪他,從少就比佢老豆送去于素秋老豆于占元處學北泒武打,出名的總共加埋七丁人,叫做七小福,個個十歲多,一唔聴話就受打受罰,所以養成自卑心態.又使我想起多明呢加認識的一位己經失去聯絡的朋友.


朋友介紹我認識時講过他的名字,但我忘記咗,個個人都叫他做靚仔,17至19歲左右,滿臉稚氣,他在朋友五金店對面街的唐人雜貨店做雜工,早上9時做到晚上8時,星期日休息,我到過他做工的雜貨店好幾次,見到店內有一告示寫上西班牙文,意思是''本店蠅頭小利,絕不掛賬'',見到好多人都是自携一小膠樽買生油四份 一 升,,亦有人買幾枝香煙,亦有買米半磅,香腸半條或大半條,臘燭,火柴等, d 人真係好窮,生意濕碎,但人流多,算山大斬埋有柴.


朋友同我講靚仔的父母就是怕他在香港讀書不成,怕學壞,所以送他來這裡比佢老豆的同鄉代為管教,他住的宿舍就是雜貨店的樓上,有次我去到他叫我上去宿舍睇下,一進去見到兩張碌架床,他指個張上層是他睡的,我睇到牆上有二行字 ''我们在天國相見,神自會審判奸人''我問邊個寫?佢話佢寫.後來我問朋友点解他要寫這些?原來他宿舍有人唔見錢,懷疑是他幹的,他有冤無路訴,從二樓跳下,大難不死跌跛咗隻腳,所以行路有些少拐拐地. 唉奸人如何會去天國?係去都係去地獄啦.正蠢仔

種蕃薯

今日講下種番薯,番薯非常粗生易種,先將一條番薯斜角切成幾舊,放在泥土中,隔二至三天淋一次水就可以.個多月後就長出根,番薯嫩葉可食,番薯不能施太多肥,否則只長葉不長番薯.

 

 

 

掘岀來只不過影相比大家睇,已經長出根

 

 

 

 

 

煮咖哩

呢個咖哩煮法,是我的一位獲獎馬來西亞華人厨師朋友教我煮的,他以前在檳城一間馬拉餐館做大厨,20年前以技術移民來澳洲墨爾本.

方法先把香茅,洋葱,蒜頭炒香,咖哩粉加水搅伴,放入剷到有咖哩香味然後加入雞湯加入椰奶,幾片 bay leaf 加適量糖,鹽, 我喜歡加一些蕃薯,薯仔,紅蘿葡,雞脾雞翼一起煮.

 

 

 

 

一個舊籌碼的故事 6

影星成龍講過,全世界最大的貪污國家是美國,佢不是無知就是冇去過中南美洲和加勒比海,行路人去過的中美洲七國和加勒比海等小國叫貪污小國,實當之無愧.

想起朋友老豆開的小五金雜貨店,西班牙文叫 Ferreteria ,只賣輕便的小五金,如鐵釘,鐵線,鐵鎚,銻煲,手鋸等,個日早上我去到時剛好見到有衛生幫查衛生,一向見慣香港的衛生幫只查酒楼,食品工廠,街市等,小五金又唔係食物,查乜? 所以話一處鄉村一處例,朋友同我講,呢度任何生意一張商業登記証背後,一定要附有一張叫合格衛生紙 salud publica一年要蓋番二/三個印 ,因此佢地有權查,有權話你櫃枱唔乾淨,話你鋪的地面污糟,不过唐人多是怕事息事寧人,個個都習慣識 do,咁大家咪 happy咯,若果唔識 do,聽日唔使開門,搅好清潔,等亞 sir再來好好檢查.


我租咗一部福士甲蟲車三天,大約30美元多些,不限里數,架車比較殘舊,朋友連我全部男女共六人迫在一起,架車冇冷氣,開去一個地方叫銀港 Puerto Plata  http://www.activecabarete.com/info/ ,途經第二大城市 Santiago,旅遊勝地銀港當時仍未完全開發,只有局部開發,高速公路行一段後又變回爛泥路,冇五星豪華渡假酒店,但海水清澈無污染,真係好靚,我們租的是石屋,有厨房可煮食,物價好平,老番用牛油 blanched 好大隻龍虾才幾美元,而且還有馬騎,這亦是我呢生人第一次騎馬,好多人都唔知,第一次騎完馬之後,晚上個 pat pat 尾龍骨好痛,又去捉鮑魚打魚,晚上成班人去海灘,飲椰青水,燒野食唱歌跳舞,抬頭一望,繁星滿天,個種靓法真係唔識形容.


歡娛嫌日短,煩惱恨夜長,幾日一陣就完,回程時我比一位交通差捉住,佢話我超載多一人,又話要拉要鎖,後來朋友識 do 冇事啦,開咗一大半路程,又比一部警車截停,佢地話我開得太快,要告我超速喎,大佬,條泥路沙石沿途,請问如何會超速?

曇花又再開花

幾個月前自家繁植的曇花又開花,之前送佐幾盆給朋友,佢地全部都冇開花,有一位印度朋友還種到瓜佐,唉好似種菜咁,每天淋水,想唔瓜都難咯.

13/6/2013

 

 

12/9/2013

 

30/11/2013

 

 

1/12/2013

 

 

2/12/2013

 

 

 

 

4/12/2013

 

 

 

 

 

火百合

幾個月前,朋友送佐一棵火百合給我,不經不覺我又將它繁植成為三盆,而且更有一盆開花啦.




 

 

 

雖然用手機拍,好似有微距效果

 

 

 

 

午餐

皇冠賭場二樓的一間餐廳叫明園,幾個月前去試過一次,上個星期日經過,望一望原來已經摺埋,換佐越式餐廳.

呢間明園的牛腩麵和燒肉麵都不便宜,而且牛腩燒肉一般 , 每碗都要$13.00 茶每位又要$1.00

燒肉湯麵 $13.00