一個舊籌碼的故事 5

香港前幾日發生一單家庭暴力事件,搅到斬死人咁大鑊,呢單 case 同我以前在多明尼加認識的幾位朋友,其中一位已經冇联络的有些相似.


以前聖多明歌 Santo Domingo 香港人叫首都,老華僑叫皇城,唐人總數加埋唔夠一千,好多唐人收工晚飯後就去會館賭博,這些移民中,大部份都是香港親戚朋友介紹賣身前去,即是由僱主幫他們辦移民手續,代支付單程機票,每月在工資中扣減,這些賣身的移民,本身在香港多是冇乜學識,冇乜謀生技能,咪飄洋過海,博一博咯,當然其中一定會有些好仔唔賭和勤勞慳儉的,有可能會出人頭地,飛黃騰達,不過都係極少.


呢位朋友我第一日相識到今日為止,30多年後還印像深刻,第一次見他時,長髮披肩,當時社會風氣仲好少男人留咁長的頭髮,所以人人都叫他做長毛勤,他一開口就一定帶有粗口助語詞,朋友同我講他開鐘錶店 rejoyeria ,嘩咁叻仔真有本事20歲多些就開鐘錶店,我在香港打工捱半年多才夠買來回機票,當時我的人工勉強都可以叫做高,真係羨慕欽敬,心想要跟佢好好學習,朋友話过兩日帶我去佢鋪頭行下,個日去到一入店內,只見到一個木鏡櫃內裡只放幾條皮錶帶,膠錶帶,鋼錶帶,幾個大6雄雞牌上鏈鬧鐘,幾隻粗碼上鏈錶,如此叫做鐘錶店?心想仲衰过香港的樓梯底修錶店,我同佢講勤哥,點解唔入多些貨? 笨X,入咁X多貨做乜X?開生意整張商業登記証,只不过拿去比美國大使館睇,等簽X咗旅遊簽証咪去美國做黑市居民.


大约1979年年尾有日我打電話比我朋友,傾談中問起長毛勤等人點呀?佢話長毛勤好惨,大前年去咗纽約 同一土生華女結婚,出咗綠咭後就話要離婚,某日個條女等佢放工,一槍打他的頭部,点知唔瓜得,差不多變咗半個植物人, FBI 打電話比我的朋友,問他有乜嘢親人?嚇到我朋友半死,無喇喇有花旗 FBI 搵佢,原來長毛勤的銀包內有一張我朋友的咭片,後來我朋友返香港探親經纽約順便去医院見他,他一見我朋友就淚如雨下,講野又唔清唔楚,朋友都唔知道佢想講乜,唉花旗佬唔會白白養佢一世,一有新藥發明就搵佢老兄做臨床試驗品,係咁拮,依家生死未卜.