租單車

睇網友華娃兄的網誌,知道他是踩單車高手,我都有好多年冇踩單車,剛好呢個聖誕新年假期,我多次同小兒小女到市中心購物,漫步墨爾本市中心,睇街頭表演,我有 post 在 facebook,又坐在如巴黎街上的咖啡店,一邊喝咖啡,一邊看街外遊人,行下見到有單車出租,想起華娃兄對單車有研究,所以拍幾張照片介绍一下.


全球有百多個城市有單車出租的設施,墨爾本呢間在市中心範圍之內有51個站,每站都可租車和還車,每站長短不一,半小時内免費,付費要用信用咭,按金50元,交好租金後就有一條膠匙弾出,當日我見有位花旗仔和花旗妹租單車,但見唔到有租頭盔的設施,我就厚多士的問他們頭盔如何租?他們說是自己從花旗帶來的,踩單車可省交通車費,而且又環保,更可強身健体,得閒我都要踩下單車咯.

今天是2014年最後的一天,明天又是新的一年開始,在此祝願各位新年身体健康,财源廣進.

Dinner at Hilton

下午四點半到, happy hour 吹水到六點半

頭盆三色生蚝,加幾粒黑白魚子

牛仔扒

今個星期二晚上有位鬼佬朋友請我去希爾頓酒店鋸扒,他住在昆士蘭,每次來墨爾本就請我鋸扒,,每次都是他請,請到我都唔係好想去,我跟他說雖然你大把錢,但每次都是你請,這樣不太好吧,比我請番你一次得唔得?他說好下次吧,可惜每次都是下次.

墨爾本市中心有兩間希爾頓,相隔不遠,開車大約五分鐘車程,兩間我都去過,不過呢間比較舊,我對上一次來己經差不多是一年多前,以前都幾旺,有好多客人,不過今次整個晚上都是只有我們呢檯客人,感覺味道同以前不同,差咗,做飲食生意,最緊要食物質素好,味道好.

一年多前我請朋友亦是在呢一間希爾頓酒店,不過唔同餐廳http://ngwai.blogspot.com.au/2013/10/21102013.html#comment-form

一個新籌碼的故事

新西蘭全國第一間赌場,基督城賭場的一個一元籌碼

去年聖誕前夕我寫過幾篇博文叫''一個舊籌碼的故事''尋晚鬼佬同事又叫我去皇冠賭場飲嘢吹水,剛好見到一老表賭客檯面上有幾個面額100,000元的籌碼,籌碼是四方型,大約是iphone 4 的呎吋,深藍色,一萬元的亦是深藍色是圓形,我以前親眼見過一位表叔落注,每注幾萬有時十萬.錢從何來?說起籌碼又使我想起曾在一位财經博客處留言,講博主日日炒出炒入,如此炒作等同賭場賭博,怎能叫價值投資?如何能踏上财務自由之路?有人話我抽水,作大炒股賺咁多,一定是吹水,更有話我虛言浮誇遊歷過幾十個國家,大概是廚房和廁所,不過廚房以前只去個多明尼加的一間酒樓,''一個舊籌碼的故事''有講及,我以前記憶力極好,我去過好多國家的賭場,只不過有些舊籌碼又搵唔到出來,只有幾張相片,就算有風景的相片,都是只有我自已,我的貓樣又不靓仔,貼出來使人反胃,冇証据無謂多說, 網友 Shu 兄留言,''你有種令我相信是實話的感覺,那是你說得很誠懇,和有歷歷在目的言詞,假如不是真的?又怎會有那麼實在''! 說真的他們相信也好,不相信也好,對我來說冇乜所謂,輸錢的又不是我,拿呢幾個月他們組合中的垃圾股屢創新低,苦不堪言,不想再說了,再說又以為講風涼話,幸災樂禍.


今次又臨近聖誕節,想寫篇博文叫一個新籌碼的故事,呢個籌碼是新西蘭基督城一間賭場的一個一元籌碼,是我在賭場跟一位香港人賭客換的,當日我見他們講廣東話,就問他''亜哥可不可以換個一元籌碼給我''?我比番一元你,但他不肯收,他比了這個籌碼給我,我要一個最少面額的籌碼,是作為纪念品,好使將來老咗有些少回憶,呢間賭場是新西蘭第一間賭場,當時面積非常细少,得廾多張赌檯,後來再擴充,剛好當晚是大除夕,到了大概十一點五十七分鐘左右,有荷官叫人唔好落注,所有賭檯都停止賭博,蓋上紅布,跟著各人倒數,十九八七六五四三二一,大家拍手掌,高聲大叫 happy new year.


我去過幾十個國家,有好多國家都去過幾次,如新西蘭前後去過三次,威靈頓去過兩次,因我有一好友住在威靈頓,他夫婦無兒女,三間房有兩間是空的,香港人認真迷信,話空同兇差不多同音,怕唔吉利,所以叫吉房,有次住在他家的吉房,都好我又慳番些酒店費用,他是香港大學化工系畢業,以前在香港一間美資化工原料公司做,行行企企月入幾皮,真係羨煞我也,他夫妻移民新西蘭是怕香港回歸後冇自由喎,可惜呢 d 技術在小國新西蘭是冇用的,因環保嚴格關係,化工廠不多,唔同表叔鍾意污染癈料倒去邊就倒去邊,英雄無用武之地,變咗高不成,低不就,後來又搬去奧克蘭,最後又回流香港,記得剛到的第一天晚上他帶我們去 lower hutt 的一間叫明華閣酒家吃晚飯,他說呢間的中餐不錯,他認識老闆德哥,徳哥介绍咗一個醬爆鹿肉,味道真係好正.

聖誕咭

前年郵費一元六角

去年郵費一元八角五分

今年郵费比去年貴了三成多,加幅都幾厲害

尋日又收到他的聖誕咭,每次收到他寄給我的聖誕咭,都感到奇怪,還有人每年寄聖誕咭给我,仲和他太太一齊親手寫滿閒話和祝福,他是蘇格蘭人,認識他大约有十二至十三年左右,佢以前在一間中東大航空公司任駐澳洲分區經理,因我認識的一位蘇格蘭朋友和他是同鄉兼好友,他每次請我去鋸扒都搵埋呢位經理和他太太一齊,我都唔知乜嘢原因,他和他的太太同我好投機,都好多嘢傾,後來還成為好友,三年多前他退休後移居溫哥華烈冶文,他臨走的前一天晚上,我請他和他太太吃日本餐,吃完之後他把我擁抱著良久,我好傷心落寞,我的蘇格蘭朋友退休後又返回蘇格蘭,而他又要走,當時他的太太用手機拍下照片,他們到了加拿大後 send 比我,每次睇到呢張照片,真係感概.

他人品極好,待人接物亦冇睇唔起任何人,好耐之前有次他同我講,若我搭乘他做事的航空公司班機,頭等或商務不滿座的話,可以升級比我,不過我講比佢聽,就算頭等商務唔滿坐,upgade 我都唔會坐,因我性格唔貪呢 d 便宜,一是自己有錢就坐,冇錢就捱經濟位,他後來同我蘇格蘭朋友講,我同佢好多的朋友唔同,佢好多朋友間中會問他可不可以升级?

歲月匆匆走過,不經不覺聖誕又快到,祝各位聖誕快樂.

神戸

元町一番街,是地震後新建的

唐人街

今日又帶大家去睇下神戸,他的郵輪2002年和2003年停泊神戸港二天,而他每次只有半天的時間,只能匆匆走馬看花式的遊覽,他說去咗市中心和唐人街,我之前同他講,神戸我亦去過二次,每次都比他多兩天半,因每次都停留三天,當然他以前可能會有些懷疑我的說話,我呢個人冇乜好處,但我從來對朋友都是坦誠真心,時間就是一個最好的証人,不過他點樣都不會似財經博的盲毛留言者,會懷疑我,但他更不會無知的話我虛言浮誇遊歷過幾十個國家,大概廚房和厕所,我好心留言,因為我錯過,付出過,唔想佢地重覆我的錯,可惜盲毛冇感激我,連我的留言真假都不會分别,如何去分别博主們羸幾多的真偽?股神名言 ''潮水一退就知邊個冇穿泳褲'' 唉依家潮水未尚退,盲目跟人炒的盲毛們已經輸到苦不堪言''比股市大鱷剝衫剝褲剝埋鞋,真慘.

番睇唐人街的照片,溫故知新,感覺好似同香港上水的自由行差不多,似曾相識,原來神戸亦比老表的自由行攻陷咯,到處坐滿人.我去神戸大概比他早十幾年,當時我和朋友由大阪租車去神戸,經阪神高速,大约兩個多小時左右,不過呢條高速公路,好多都是架空天橋,於1995神戸大地震震塌晒,依家的都是從新建做,神戸最出名的當然是神戸牛柳,講霜降雪花度,我第一次吃感覺好似吃棉花,入口容昜溶化,牛肉味濃,到今天還回味.

巴拿馬運河

巴拿馬運河

沿岸風景

美洲大橋

今次又帶大家睇下巴拿馬運河,這是我大廚朋友最後行的一次船,因為他於2004年申請澳洲技術移民獲批准,他於2005年上岸结速長達十多年的行船生涯,移民來墨爾本一間酒店當廚師,剛好我認識的一位澳洲佬朋友亦在那裡當廚師,好似07年聖誕前夕在朋友家燒烤時認識他,當時都幾多嘢傾,他說的中美洲和加勒比海的幾個國家,講完一個我話去過,再講一個我又話去過,再講亦話去過,再講我都話去過,他似乎以為我吹水老作.

我去巴拿馬大约是31年前左右,當時運河區仍是老美管轄,有美軍駐守,尚未交還比巴拿馬政府,我們去Miraflores的運河區睇郵船過巴拿馬運河時的地方還是平地,只有一間展覽館介紹運河開墾時的幾張黑白照片和解說,後來才建造幾層高的觀景大樓,當時巴拿馬在中美洲加勒比海一帶的國家中算是比較發逹的國家,巴拿馬城有好多高樓大廈,個陣時最高的領導人是軍事強人 Noriega 落里加,後來牵涉貪污,走入一外國領事館要求政治庇護,老美泒幾萬軍隊入巴拿馬,最後捉咗條友返美國審判,判坐監30年,好似2000年放咗監.


上面最後的一張照片是美洲大橋,經此橋北上可達阿拉斯加,南下可到智利,全長四萬多公里,將來我退休後也想試下巴拿馬自駕遊,經哥斯達黎加,墨西哥到洛杉磯,順便去洛杉磯,三藩市探我的二位好友,好多年前的一次自由行就是住在他們的家,以前我去巴拿馬時未見到有此橋,遠望也不見怎樣雄偉,我話青馬大橋比它雄偉得多.

郵輪 Crystal Harmony

阿拉斯加冰川遊

今次又 post 一些呢位大廚朋友以前 send 比我的照片比大家睇,今次是阿拉斯加冰川遊,呢條郵輪是他同呢間公司做過工的第二條郵輪,他前後總共 send 咗百多張照片比我,他不止說話長氣,連 send 照片都是一樣,佢有時一天 send 十幾廾張,包括他交過的幾位女朋友,甚至連他細妹的家庭和小孩的照片都 send 比我睇,北京,東京遊亦有,不過要搵都好痲煩,因為有些少是我用手機拍的,而且相隔太耐,有些又唔知放咗去邊度.


交朋結友最緊要講緣份,所謂人结人緣,酒逢知己千杯少,話不投機半句多,可能佢和我有緣份,又或者佢可能覺得我是一個可以傾訴的對像,好似他上班時遇到一些不愉快的事,不公平的事亦向我傾訴,有次甚至想投訴他的 supervisor亦同我講,我聴他講完,好言安慰,有時覺得他對咪精神上支持他,順手幫佢插埋個位 supervisor咯,佢就開懷大笑條氣順哂.

投票

投票站門外,開放由早上八時至晚上六時



呢位女仕幫她妹 即下圖的獨立侯選人拉票

澳洲的選票

上個星期六11月27日是澳洲維多利亜省政府大選,澳洲分聯邦大選,省政府和市政府大選,都是四年一次,澳洲是全球30個強制性投票國家之一,若果冇去投票,要解釋和罰欸,由20元至170元,冇合理理由更可能要上法庭兼留有民事案底.


澳洲的選舉制度是全世界獨一無二,採用 Alternative Vote System 選擇投票制,因冇其它國家採用,而且又復雜,所以好多人都攪唔清,每次投票都有兩張選票,候選人旁邊有四方格,選民可依自己偏好每格順序填上號碼,1號2號等等,所填的1號即是喜愛票 Preferential Voting 首輪點票候選人得票50%以上就當選,若果冇人當選就淘汰得最少1號喜愛票的候選人,並且將其分配给第2名,從新分配,如此類推,直至有候選人得票50%以上當選為止.


想起香港最近攪到滿城風雨的佔中運動,目的是要一人一票選特首,台灣剛剛的九合一大選,國民黨一敗塗地,輸比一個無黨派背境的政壇新丁,差不多所有政棍未上台之前乜都承諾,上台之後就扮失憶. 澳洲是三级政府制度,聯邦政府,省政府和市政府基本上是平行和獨立運作,和大6老表不同,老表可由地方上調到中央,如習總,由福建省長一直升到做總書記,但是澳洲無論一個市政府的政棍表现如何突出,也不能由市政府提拔到省政府,省政府的也不能提拔到聯邦政府.

種辣椒

2012年5月



2012年8月

2013年6月冬天時移入棚架,好重要花費好大氣力




2014年10月夏天陽光多日照時間長,又要再次花費氣力移出花園

兩年多前我去一間越南餐館吃湯粉的時候,隨碟附上的生芽菜和幾粒生辣椒,吃咗一粒後感覺非常辣,因我唔吃得辣,不過我有幾位朋友就吃得好辣,心想不如帶幾粒食剩的種籽返屋企發芽,試下種唔種得生,好彩個多月後發到兩株芽,我將它們分為兩盆移種在較大的盆.


有一天我的一位印度朋友和他太太小孩來我家玩,他吃得很辣,我就把其中一盆較為粗壯的送给他,等他有自家的新鮮辣椒吃,我告訴他多次,不用澆太多水,用手摸下的泥,乾就淋些水,一年後生長成熟才施肥,因辣椒是熱帶植物,不耐寒,冬天時要用開咗幾個洞的透明膠袋遮蓋,或者移入室內,可惜他種不了多久就種瓜了.


十多年前睇過一本飲食雜誌介绍辣椒,全世界最辣的辣椒一,二,三名全產自墨西哥,第一名是 Habanero,第二是Serrano,第三是 Ancho ,第一辣椒的辣度驚人,可高逹500,000個 Scoville units ,廚師在處理呢種辣椒時要帶手套和面罩,中國最辣的指天椒才不過30,000至50,000 Scoville, Scoville就是量度辣椒的辣度,是一百年前美國一位藥劑師 Wilbur Scoville 發明的量度方法所以用他的名字.


後記,墨西哥的 Habanero一哥的地位已比印度的 Bhut Jolokia魔鬼辣椒取代.

http://zh.wikipedia.org/wiki/%E9%BB%84%E7%81%AF%E7%AC%BC%E8%BE%A3%E6%A4%92

http://the-sun.on.cc/cnt/lifestyle/20090817/00479_004.html