不及格的牛扒

今個星期二去皇冠賭場內的一間餐廳叫 Margos 吃午餐,對上一次去是七個月前帶香港來的朋友去,因皇冠賭場最近每天在電視賣廣告,一客午餐$13.95仲可免費泊車五小時,我泊咗車後,先坐電車去中國簽証中心辨理大 6簽証,然後回來呢間吃牛扒,唉呢塊 porter house 真差,太生又多筋,完全咬唔入,我老妻叫我投訴,算啦咁平,而且我都唔係一個唔係好鍾意投訴的人.

想起30多年前第一次在日本神户吃燒牛扒,亦是唯一的一次,個種牛肉味道濃郁,牛肉的雪花簡直完美,入口即溶,到依家一想起還流口水,以前日本仔的和牛都唔知有冇 BMS 即雪花度數,1至12級,神户牛最少要六級以上,神户牛是日本仔三大和牛之一.


日本仔和牛
http://www.buedelmeatup.com/2012/12/04/the-difference-between-kobe-and-wagyu-beef/

墨爾本唐人街

 

 

 

 

見到火鳳凰就會想起網友 Stella 姐

西湖大酒家

呢間教堂有百年歴史

教堂對面以前是一楝二層高的舊樓,二樓是一間唐人會所,內有麻將,牌九耍樂

今個星期三去唐人街簫氏機構攞左麟右李演唱會的門票,攞完後就順便用手機影番幾張比未來過墨爾本的網友睇下,呢度的唐人街比三藩市的細好多,只有一條街,以前都有唐人雜貨店,賣下唐人雜貨,不過執哂好耐,依家只有幾間中式酒樓,日餐,馬來餐和一間唐人西餅店,禮品店等.

十多廾年前有一次朋友叫我去唐人街西湖大酒家吃宵夜,我都冇吃宵夜的習慣,剛好是第一次,吃就吃啦,吃咗冇幾耐就見到影星洪金寶,成龍,元彪等人進來吃宵夜,成龍是我第二次見,佢一向鼻大,睇唔起人,佢個頭同眼只望著天花板,反而洪金寶仲微笑同我地點頭,成龍呢幾日比佢個衰仔祖明攪到一頭煙,自己本身是禁毒大使,呢次比個衰仔破埋個招牌.



唐人街有二間教堂都經過百年風雨,到今日還在,圖片上的教堂,30多年前每逢星期天都有一位唐人牧師用大聲公大叫,各位朋友鄉里,想到天堂的請來這裡,想賭錢落地獄就去對面,不過想去天堂的人少,想去地獄的人就多.

許冠傑演唱會

豹紋衣帽

上個星期天在皇冠賭場二樓睇許冠傑演唱會,當晚全部滿座,大約2000多人,他說是第一次來墨爾本,因睇見歌迷熱情不減,話希望明年又再來,呢個演唱會冇司儀,嘉賓有佢兩個仔懷恩,懐谷,和懐谷的老婆,同埋佢徒弟,佢唱完第一首歌後,唱第二首時就走下臺想同歌迷握手,可惜歌迷太熱情,大批人蜂湧上前,攪到場面失控,令他和保安寸步難行,之後只好留在臺上唱到完.

他今年雖然66歲,但唱歌仲好夠氣,二個半鐘幾乎由頭唱到尾.記得好多年前,有次見到電視訪問佢,他說他小時侯家境很貧窮,佢老豆做行街推銷員,行到鞋爛咗都冇錢買,到佢自己揾到些錢想買比佢老豆時,佢老豆已經不在,子欲養而親不在,所以他作咗一首歌父母恩紀念父母親,今次都有唱,唉人生好多嘢,到真正失去的時候才會後悔可惜.

今年10月6日剛好是我們從香港回來第二天,譚詠麟和李克勤來墨爾本 CONVENTION CENTRE開一場演唱會叫左麟右李,講真的,呢兩條友的歌我一首都唔識,一首都未聽過,不過我老婆已經買咗門票話請我去開吓眼界喎.

自助餐

睇網上鬼佬的食評介紹去呢間試下

前幾日晚上去呢間酒店的餐廳吃自助晚餐,每位26澳元,好耐冇在墨爾本吃自助餐了,因為又貴又唔好食,呢間都冇乜嘢食冇生蚝,魚生,羊架,食物多是啱鬼佬口味.十幾年前有一間中國人開的叫超羣中西式自助餐,都不錯因離我家太遠,開車差不多要一個小時,好多年都冇去,可惜經不起時間的考驗已經摺埋.

澳洲的食評博客多是用真名,因好多人都是參考食評去揾食,愈出名愈多人睇,又有廣告收入,出埋書名成利就亦有,三年多前澳洲 TVB 介紹過其中一位博客的新聞,原因他在雪梨一間意大利餐廳吃餐時等得太耐,然後在他的博反影,個位餐廳老闆睇到後就留言反駁,想快有得食,不如去麥當奴,博主又反駁,嘈來嘈去,最後大家還要出動律師告上法庭,兩條傻老益咗律師.


睇到網友 Stella 姐介紹的丽斯卡爾頓自助午餐,我叫朋友幫我訂咗今年九月六位,請埋佢兩公婆,去年九月叫他幫我訂 Stella 姐介紹的家常便飯和美味少爺介紹的香港仔柏記,但他話柏記訂唔到位,幫我改訂第二間小炒王,今次我只叫他訂 cafe 103,其它我自己訂,以免他又幫我揸主意.