打邊爐



番茄湯底

豬骨湯底

尋晚去呢間叫金輝酒樓任食打邊爐,對上一次去已經是五年多前的事了,因當時新開張冇耐,咪去試下咯,咁巧合今晚坐的檯也是同上次坐的一張,呢間打邊爐每人面前有小一電磁爐,放有一小湯鍋,有幾種湯底任揀,豬骨,番茄,人參雞,麻辣鴛鴦等,所有菜牌上有的食物都任叫任食,只有鮑魚仔限每人一隻,我數過餐牌的食物都有八十幾種,有蝦,帶子,肥牛,鹿肉,羊肉,睇落都算幾新鲜,食完又可再叫,每位收費40.8元,午餐好似平10元,尋晚七時卅分去到,一檯客人都見不到,直至到我們快要走時才見到有五位客人進入,打邊爐生意真係難做.

呢度打邊爐的生意同香港剛好相反,想起四年多前我們返香港玩時,朋友請我們一家人到沙田稻香打邊爐,他老婆五點多就去排隊等位等開門,等到有位後再打電話叫我們去,排隊等了個多小時就是為佐打邊爐,我老妻仔女都非常鍾意打邊爐,不過我唔係咁鍾意,食物係咁煮,乜野營養都冇哂,加上又熱焗到成頭汗.

十多年的盆栽植物

呢棵仙人掌2000年開始種的,好快種了16年

幾年前剪旁邊的橫枝出來繁植

呢兩棵都種有拾多年,香港有人叫呢種樹做風水樹

也是將橫枝剪一條繁植

尋日同秋葉阿姨講起我家種了好幾盆植物都有十多年,講真的用盆種了十多年真是不容易,因為植物根部局限在盆內,地方有限根部不能伸展,而且泥土的氧份肥力過一段時間後就會比植物吸收哂,所以要隔一段時間後就要施肥,而且每三至四年又要把一半舊的泥土換出,換入另外一些新泥土,保持泥土的肥力.

呢棵仙人掌買回來時同手掌尺寸咁上下大,已經由细盆換中盆再換大盆,好多年才開一次花,開的花好細朵,深紅色,呢兩棵所謂風水樹是朋友比我的,我將它剪枝分為兩盆,也是種了十多年,我都繁植佐好多盆送比同事朋友,不過他們都種不了多久就瓜哂,盆栽植物,不能澆太多水,又要定時修剪施肥,又不要把它直接放在太陽光下的位置曝哂.

蘭花移植

呢盆蘭花已經種了超過十年

Pine bark松樹皮供蘭花用,換盆時將舊樹皮丢掉,換入新樹皮,大約一年左右換一次

膠盆底部用電鑽開多幾個窿,方便排水

將蘭花倒出,枯枝爛根修剪

大致可分為三至四盆,每盆幾根就掂

將舊樹皮掃走

呢盆蘭花唔知叫乜名,大約種了十年有多,一堆花中一枝開花,每枝開花六至七朵,開的花好细朵但好香,真係好香所以蘭花有王者之香,花香不在多,成個棚架都聞到香味,而且更是純天然的香味,仲香過巴黎之夜的香水,我都唔知巴黎之夜的香水乜野味,是我朋友有次來我家聞到後大讚好香時講的.

我前後已經分盆移植過幾盆,每次都是送比朋友,但他們全部都種瓜哂,更不要想它們開花,聞一聞它們的香味,我想最大原因是他們好似種菜一樣,每天淋水,排水未完又淋,根部多水浸爛,想唔瓜都幾難,蘭花根本不用每天淋水,夏天天氣炎熱六天至八天淋一次水,冬天十至十二天才淋一次,也不要施肥太多,施肥太多會肥死.

防水相機

南瓜

蘆筍

秋葵

去年十月返香港時,買了一部 Nikon AW 130 防水相機,港幣$2500 比這裡還貴百多港元,不過我想反正錢是在香港股市賺的,取之香港用之於香港,算幫一下香港的零售業.相機買回來有幾個月,冇乜時間去影相,前天才是第一次拿出花園拍照,呢部相機像素1600多萬,防水深逹30米,又防撞擊,仲有全球衛星定位,我一按衛星定位的制,就出一幅地圖標示我現在的位置,連附近幾條街道的名字都列出,說明書更寫有本相機受到美國出口管理條例管制,出口轉口去古巴,伊朗,北韓,蘇丹和敘利亜要美國政府批准,好似有些軍事價值.

南瓜不經不覺都長得幾大個,若果二/三天冇睇,一見又大個佐好多大得好快,蘆筍又愈生愈多,數下已經有十一條,明年開始步入收成期,秋葵種了三棵,都有一個多月了,種籽是我在網上向雪梨一間種籽店購買,一小包內有25粒,連郵費澳元五元多,澳洲法例規定所有種籽都不能從外國帶入,包括郵寄,若果入境攜帶種籽,申報就充公,冇申報比佢地查出就好大鑊.

Chia 奇亞籽

奇亜籽原價39.95一公斤,減價後29.95

依家生意差好多,以前初開張時晚晚坐無虚設

奶茶加奇亜籽

本月9日請朋友兩公婆去吃晚餐,呢餐可以叫做開年的晚飯,他們每年來幾乎都會在這間酒樓吃一餐,因他們喜歡吃中餐,而且呢間酒樓靠近我家,開車只雖要幾分鐘車程,吃完後就到我家再吹水,然後才送他們回酒店,他們每年都買大量物品返回香港,羊油,衣服,鞋,其中以買 Chia 香港叫奇亜籽最多,今次買了8公斤,話夠兩公婆吃到明年再來時再買,他說便宜過香港,又不怕有假貨,仲話是天然健康食品.奇亜籽原產地是中南美,移種澳洲後,不知是澳洲生物科技好,或是氣候適應,依家產量是全球最多,他說兩公婆吃了這Chia奇亜籽多年,身体健康喎.

我老妻也有吃這種 Chia 奇異籽,有時仲加埋白米一起煮,變佐吃飯時奇異籽在飯內,完全冇絲苗茉莉飯的香味,只有奇異籽一粒一粒的口感,真係冇計,有時佢沖奶茶比我仲加埋奇異籽,我叫唔該啦,唔好再加啦,因我覺得呢種野冇乜特別功效,好多人當是神奇保健靈丹,其實均衡飲食,適量運動,心情愉快肯定好過吃乜野的保健物品.

http://baike.baidu.com/view/2730186.htm