日落觀豚遊

唯一的一個水泡,再望遠些見到黑色包住的就是救生衣

 

每人送一杯果汁punch

今次日落觀海豚遊船河,是度假村送給全包團的旅客,若果要付費每位大約40美元,名義上話送,實則全包餐加入了費用,呢個世界冇免費午餐,羊毛出在羊身上,馬爾代夫算落後國家,海上安全意識低,可能仲好過香港,原因是香港自從發生南丫島撞船意外死咁多人之後,我本人已經將香港海上安全列入落後國家行列,上船後見到救生衣全放在船頂的架上,全船只有一個大水泡綁在船頂上,我老妻唔識遊水,我同佢講如果發生沉船意外,你第一件事就是去搵呢個唯一的水泡,搵唔到算你唔好彩啦,鬼叫你後生時唔學遊水,相反今次船員話我們好彩,見到好多海豚,若果天氣不佳,好多時缘慳一面.

20幾位遊客中,有一對香港新婚夫妻來這裡度蜜月,之前在餐廳吃餐時跟他們點頭打過招呼,今次他們坐在我旁邊,男的大概20多歲,我和他只交談了10幾分鐘,感覺呢位靚仔都幾本事,年紀輕輕,出來社會做事幾年,兩人有計劃存夠首期在將軍澳買樓,亦去了幾個國家旅行,今次到馬爾代夫度蜜月,英雄出少年值得佩服,起碼叻過黃痴瘋好多,我同他年紀時有可能我賺的錢比他多,可惜我搵咁多使咁多冇錢剩.

Scuba Diving 水肺潛水




法國靚女教練 相片中顯示的時間是墨爾本時間快馬爾代夫五小時



小女背負氣樽話好重

黃色的呼吸器是救援人救你時用的

馬爾代夫每個度假村都有水上運動中心,差不多大部份都有 Scuba Diving 水肺潛水,我和小兒小女是第一次試,以前直覺潛水好容易學,識遊泳就掂,事實上是不容易的,以前睇過台灣著名女小說家三毛的一本書,撒哈拉的故事,她的丈夫西班牙人名字叫荷西,是一名專業潛水員,很不幸在一次潛水操作中意外身亡,而我以前在香港炒股証券行老闆的女兒也是持有PADI証書的潛水員,也是在一次潛水意外過身,每次想起都有些害怕.

報名參加水肺潛水,不是你話想報名就報名,法例規定若果24小時之內要搭飛機是不準參加,有高血壓,心臟病亦無缘參加,報名後先要上堂大約30分鐘,有講義播放一段簡單錄影片段,教水中動作的手勢,有一個红色的按制,若有緊急求援就按,穿上潛水衣後在腰間綁上有三至四條鉛塊的腰帶,作用是增加身体重量向下沉,左手邊有一條喉連接著潛水衣和氣樽,有兩個按紐,一個加氣一個減氣,想向下就按減氣,想向上升就加氣,初學者最深只能潛到12米,我只潛到8至9米就感覺辛苦,換氣困難,雖然有法國籍靚女教練在我身旁拖住我的手,她知道我係有些怕,小兒小女潛到12米仲話可潛深些,不過教練唔準喎,想起當日有另外一位德國籍教練問我認不認識 Allan Kwok是香港電影明星?他教過他潛水,我說不知道,後來小兒話我知是郭富城.

Veligandu 度假村

水上屋

旅遊馬爾代夫最麻煩是揀選度假島,因有百多個島每個島只有一間度假村,有平有貴有遠有近,有些以浮潛取勝,有些以海灘服務價錢吸引,我揀呢間四星度假村,是參考網上評語和 Lonely Planet 的介紹,大約預早七個月前訂復活節的三天水上屋water villa ,度假村每房送一枝香檳,若果遲一些就訂不到水上屋,只能訂沙灘屋,住水上屋有無敵海景,喜歡幾時下海遊泳就幾時遊,坐在陽台喝杯咖啡看日出日落,不聞車馬市聲,不問股市升跌,所有煩惱抛諸腦後巧舒服.

馬爾代夫度假村的膳食,大多數是分半包 half board 包兩餐,早餐午餐或早餐晚餐,全包full broad 早午晚三餐,有些更有 all inclusive plus 包括所有連酒在內的飲料,我見好多網友介紹揀 all inclusive plus,仲有送兩次遊船河,一次早上民居島遊,一次黃昏觀海豚遊,所以我揀 all inclusive plus 咯,不過三餐都是自助餐,總共吃了九餐,連我老妻仔女最喜歡吃自助餐都話怕啦,若果有人問我,我會建議他們揀半包餐half broad.

Seaplane 水上飛機

赤腳機師

從水上飛機遠眺 Male市

鬼佬旅遊天書 Lonely Planet  介绍馬爾代夫 Top 9  其中之一是搭水上飛機,說當今世界上只有幾個地方有水上飛機可坐,值得一試的經歷,見到飛機師大部份都是赤腳,我問其中一位機師,飛行高度有幾高?他說大約500至600米,但我用自己部 Nikon AW130 測過,全程最高才220多米,本來想走去搵他求正一下,也想 send email 去呢間水機公司,算啦反正我又不是出書,爛鬼博文冇乜人睇,飛行速度大約時速200公里,呢程水上飛機去我們住的度假島單程約20分鐘,但票價極昂貴,來回要310美元,有好多島冇快艇可到,焗住要坐內陸機或水上飛機,水上飛機最多只能坐15人,晚上6點後又不能飛,天氣不好時又不能飛,馬爾代夫最好天氣是十二月至四月,即是全年旺季,過了四月後會有風有雨,遇上天氣惡劣時水機會延遲,乘客不夠時更要飛去其它島載客,所以有時要等好耐,要有心理準備,因此淡季去時便宜好多.

Male 馬累

回教博物館

魚市場

石斑

大約卅年前有朋友約去我馬爾代夫玩,講真的當時我都唔識呢個地方,打聽後才知道去馬爾代夫玩幾天的費用仲貴過去歐洲玩三個星期的費用,所以我選擇去歐洲自由行,以前馬爾代夫冇開放民宿,去渡假島要搭乘直升機,當年冇水上飛機,其實搭直升機或水上飛機一樣咁貴,只不過水上飛機舒適寧靜些,和可搭載多些乘客,度假島所有消費計美元,不是我等打工仔負擔得起,大約幾年前馬爾代夫開放民宿,旅客可自由揀選,豐儉由人,頂級的渡假島一晚幾萬港元也有,便宜的民宿三幾百港元亦有,揀一些靠近首都 Male 馬累市的居民島,坐本地人的渡輪來往,更可省卻昂貴的水上飛機或快艇費用,民宿吃住便宜,只不過交通往返比較轉折麻煩.

 Male 馬累市冇乜景點,最有名的算是回教寺和魚市場,那天我們去到回教寺冇開放,步行去魚市場對開的碼頭,見到泊了好多漁船,放滿地上都是大條的金槍魚,亦有石斑,我見到有本地人買一條金槍魚,等候漁夫幫他買的魚去皮去骨,順便走埋去和他吹下水,問他咁大條金槍魚要多少錢 ?他說折算美元大約20元,石斑就6美元左右,如果我買的話價錢就不一樣,可能貴一倍至二倍,唉這種事在落後貧窮的國家司空見慣,記得有次在多明尼加買野時,問多少錢?年青人講完價錢後,佢老豆鬧佢蠢,話對我開本地人的價錢,佢老豆以為我唔識聽西班牙文.

馬累街景