許冠傑演唱會

豹紋衣帽

上個星期天在皇冠賭場二樓睇許冠傑演唱會,當晚全部滿座,大約2000多人,他說是第一次來墨爾本,因睇見歌迷熱情不減,話希望明年又再來,呢個演唱會冇司儀,嘉賓有佢兩個仔懷恩,懐谷,和懐谷的老婆,同埋佢徒弟,佢唱完第一首歌後,唱第二首時就走下臺想同歌迷握手,可惜歌迷太熱情,大批人蜂湧上前,攪到場面失控,令他和保安寸步難行,之後只好留在臺上唱到完.

他今年雖然66歲,但唱歌仲好夠氣,二個半鐘幾乎由頭唱到尾.記得好多年前,有次見到電視訪問佢,他說他小時侯家境很貧窮,佢老豆做行街推銷員,行到鞋爛咗都冇錢買,到佢自己揾到些錢想買比佢老豆時,佢老豆已經不在,子欲養而親不在,所以他作咗一首歌父母恩紀念父母親,今次都有唱,唉人生好多嘢,到真正失去的時候才會後悔可惜.

今年10月6日剛好是我們從香港回來第二天,譚詠麟和李克勤來墨爾本 CONVENTION CENTRE開一場演唱會叫左麟右李,講真的,呢兩條友的歌我一首都唔識,一首都未聽過,不過我老婆已經買咗門票話請我去開吓眼界喎.

自助餐

睇網上鬼佬的食評介紹去呢間試下

前幾日晚上去呢間酒店的餐廳吃自助晚餐,每位26澳元,好耐冇在墨爾本吃自助餐了,因為又貴又唔好食,呢間都冇乜嘢食冇生蚝,魚生,羊架,食物多是啱鬼佬口味.十幾年前有一間中國人開的叫超羣中西式自助餐,都不錯因離我家太遠,開車差不多要一個小時,好多年都冇去,可惜經不起時間的考驗已經摺埋.

澳洲的食評博客多是用真名,因好多人都是參考食評去揾食,愈出名愈多人睇,又有廣告收入,出埋書名成利就亦有,三年多前澳洲 TVB 介紹過其中一位博客的新聞,原因他在雪梨一間意大利餐廳吃餐時等得太耐,然後在他的博反影,個位餐廳老闆睇到後就留言反駁,想快有得食,不如去麥當奴,博主又反駁,嘈來嘈去,最後大家還要出動律師告上法庭,兩條傻老益咗律師.


睇到網友 Stella 姐介紹的丽斯卡爾頓自助午餐,我叫朋友幫我訂咗今年九月六位,請埋佢兩公婆,去年九月叫他幫我訂 Stella 姐介紹的家常便飯和美味少爺介紹的香港仔柏記,但他話柏記訂唔到位,幫我改訂第二間小炒王,今次我只叫他訂 cafe 103,其它我自己訂,以免他又幫我揸主意.

賭仔何曾買肥田?

呢間日本餐前身叫木村館

上個星期去唐人街蕭氐機構攞完許冠傑演唱會的門票後,行經呢間日本餐廳感覺有些奇怪見到同以前完全唔同哂,仲改賣日式碗麵,因我有一位朋友在這裡做日餐廚師而間接認識這店的老闆,我和我老妻走進去睇下,順便揾朋友吹下水,點之個位日本仔同我講,佢地搬走咗好耐喇.


回家後晚上打電話比我朋友,我朋友之前打過二次電話比我,話我的手機未能接通,屋企又冇人聽,可能我去咗香港,原來佢老闆冇錢交租,比業主封咗舖,仲欠下伙記的工資,著草走佬.呢位老闆和他的太太同我朋友以前在唐人街一間日本餐廳做日餐廚師,而他的太太是做女待應,大約15年前,在他們做工的唐人街隔十幾間舖位的一間港式麵店快要執笠,到處叫人頂來做,大平賣,他冷手執個熱煎堆,賤價頂回來,就是第一幅圖片的店,改咗個日本名叫"木村館",又整咗個中文招牌叫"記得吃".


佢的舊老闆真係多得佢唔少,識咗港女同事結埋婚,開檔一齊走仲還叫埋我朋友去,店又相隔不遠,賣的都是差不多材料和做法的 gyoza, yakitori,生牛肉,豬扒,便當,啱鬼佬口味,開張後不久我去捧下場,朋友介紹認識咗佢,他是從廣東來的老表,都算叻仔,當時佢好客氣同我好多嘢傾.富貴迫人來,夫妻同心生意非常好,朋友說差不多每天都客滿,揾到第一桶金後,搬咗去豪宅區,又開平冶,又買地皮,我再去時他只同我傾二句,自此以後我都冇再去幫襯,朋友同我講佢發財冇立品,染上賭癮,輸到週身債,離婚後老婆帶咗個仔返香港,佢今年50多快60歲,時不與我,睇怕都冇セ機會番身咯.

Melbournestar 摩天輪

摩天輪入口

晚上吃完飯回程時拍的 

Melbournestar 摩天輪是繼新架坡,倫敦之後世界第三大,幾年前開咗冇幾耐,大約三十多天後,就因機械故障停開,一停經年,攪到連間公司都破產摺埋,後來比一間日本仔的公司收購咗,維修好了後於去年年尾再從開,二個多星期前帶同朋友去坐咗一轉,坐一轉大約三十分鐘,可遠眺墨爾本市中心的高樓大厦.

當初開時亦想去坐一次過下隱,後來都冇坐,因想到新架坡佬的 Singapore flyer 亦因初開時電力不能負荷,停咗電六個多小時,陰公咯班友全部被困在個鐵籠內差不多六個多小時,叫天不應,叫地不聞,所以去年到 Singapore flyer 都冇坐,而且票價又貴,只有在 flyer下 吃咗一件亞坤多士.

以前睇過一位網友,靚女詩人蜓子寫過一首詩,摩天輪下看人生,詩寫得很好,想沾些文藝氣息,把詩貼在這文,我 send 咗 email問她可不可以轉貼? 她說 OK冇問題,可惜我不知把那首詩放在那裡,找極都找不到出來.

下面有連結介紹.
http://www.melbournestar.com/

陳浩德歌迷晚宴

晚宴



海龍皇羮



薑汁大虾



 



嘉賓 Paris xu 





尋晚去咗陳浩德的歌迷晚宴,我想因為法律上的好多問題,如稅務,牌照,保險等,不能叫演唱會改叫歌迷晚宴,原本我不去的,我從冇聽過有呢個歌星,留係屋企早睡,半夜起床睇世界杯仲好,但我老婆朋友有事不能去,所以要我去,晚宴吃的就是相片中的個幾樣嘢有兩樣影到效果太差所以冇貼上,筵開20席,大約200人参加.


司儀介紹他上臺唱的第一首歌是他的成名歌,悲秋風,因冇樂隊伴奏,只有用卡拉 OK 伴奏,他說自己是亞爺級,記憶不太好,所以唱每首歌之前要看貓紙,因卡拉 OK已編排好每首歌的次序,不能點唱,他邊行邊唱,行遍每張枱,握手影相,每圍枱都有利是封幾個,我都封咗一封小利是比佢,山長水遠的來才得200人聽,賺得幾多呢?


呢個晚宴的攪手就是呢個婚宴場的老闆,我老婆打電話問何處購票,他問要多少張?我老婆話要三張,門票當晚就送到寒舍.冇法啦生意好難做,仲有尋晚佢同我講,呂良偉十月來,要不要買票支持?吓呂良偉識唱歌嗎?