一個舊籌碼的故事 4

今日得閒不如再寫多一些多明尼加,呢個國家帶給我好多光怪離奇的回憶,短短一個月內朋友介紹我認識咗8位香港移民多國的朋友,其中有3位已回流香港多年,1位去了美國纽約,1位仍留在多明尼加,其它的已失去聯絡.

先說失去联絡的兩位,一位人人都叫他做明哥,他在Santo Domingo 長堤遊客區唯一的一間頂级酒樓做大厨,他12歲小学尚未畢業,就在香港酒樓廚房做學徒,1969年呢間酒樓老闆林先生到香港招請大廚,有人介紹他去見工,林生聘請了他,簽咗三年合同,1970移民多國,老闆代付單程机機票,每月在薪金中扣付,直至還清為止,記得當初識他時,和他一起去長堤一間cafeteria 飲咖啡吃蛋糕,原來他不會看菜單,簡简單單的西班牙文都唔識講,我問明哥有冇搅錯?咁多年都唔識,他說他整天困在廚房,見的都是唐人,講的都是唐話,休息的一天多是到會館打痲雀或在家裡練神打氣功,連最容昜交的鬼妹朋友一個都交唔到.


有一日佢叫我和朋友到他做工的酒樓吃晚飯,話有魚翅吃喎,老番只識捉唔識食,賤價賣比唐人,有些人加工後運到香港上環賣,我們去到後,他帶我們入廚房参觀,這亦是我呢生人第一次入酒樓廚房,他講解每碟菜都要有人做執碼,即是將菜放在碼碟上,厨師走油時順序先把最難熟的下鑊,又講解魚翅如何發如何去鯊,十分專業,不过我都忘記哂.吃完晚飯後他同我們講今個星期六下午三時會在吳氏宗親會館表演神打,叫我們有興趣可以去睇他表演.個日去到時已圍滿人,只見他頭手腳不停的動,用刀砍肚時,真係陰功咯一刀砍入,血流滿地,嚇到個個大叫,我都冇眼睇咯,明哥佢入医院缝咗 20幾針.

晚餐

網友秋葉阿姨講起晚餐,剛好這就是我們昨天的晚餐,好多時我老婆whats app 比我,叫我放工回家時經過酒樓就斬些燒鸭燒肉,好多時斬料都要排隊,有時又叫我買一打新鲜生蠔,以前試过有一段長時間每日三餐岀外吃.想起香港肝臟權威黎青龍,他的家姐是前教育署長余黎青萍,他依家每日三餐都是外出進餐,幾年前黎生接受雜誌訪問,問他最討厭是甚么?他說是同蠢人溝通.

半隻燒鸭,一公斤燒肉

她的拿手小菜李錦記蠔油西生菜

 

朋友送的2011白酒, 紅白酒都唔好放太耐,好多表叔以為愈贵就愈好,  Lafite 炒到幾千元一枝,唐生講幾千元一枝同百幾元一枝分別唔大,剛聽新闻他九龍塘豪宅潛建,老婆認罪罰佐十一萬大元,仲有表叔以為愈放得耐愈好飲,其實放得耐分分鐘壞佐變酸.

金錢樹

網友 Peter 兄問香港旺角的花墟有冇曇花賣?剛好我今年10月返香港玩時,途經順便睇下有乜靚花,因我是一個愛花之人,佢地賣的多是鲜花,種植盆栽的花就不多,咁大盆的金錢樹才賣48港元,都唔知点解香港人叫呢種樹做金錢樹?莫非發錢寒.

 

1 Oct. 旺角花墟

 

 

三年多前在朋友家剪佐一小枝來繁植,後又再變為二盆,香港叫金錢樹,學名叫 Zamioculcas Zamiifolia,原產地非洲,極耐旱,又唔需要太多陽光,樹葉本身帶有些微毒素,所以冇乜病害.

曇花開花

4  NOV.

 

11  NOV.

20  NOV.

21  NOV.晚上

22 NOV. 早上

 

 

今晚請我洛杉磯來這裡玩的朋吃中餐,冇辦法因他們喜歡吃中餐,又話這裡的中餐好吃過羅省好多, 明天晚上請他們吃越南餐,後天早上就回美了,有些唔捨得,唉都唔知要等幾耐才會再見.
好快又到周末啦,祝各位愉快

一個舊籌碼的故事 3

多明尼加首都 Santo Domingo 有條最旺的街叫 Duarte ,所謂最旺都冇上水一條街旺,有兩間華人會館,旅多明尼加華僑總會,另外一間叫吳氐宗親總會,有日下午朋友話帶我上去呢兩間見識,兩間都是在附近,步行相距幾分鐘左右,一進去第一眼就見到有好多張麻將枱,好多唐人在打麻將,班唐人打的是舊章麻將,乜野叫舊章 ?即是幾十年前台山亞伯比人賣豬仔出埠捱騾仔,收工時冇野可做所打的麻將,要數糊兼計番,開明槓幾多糊,開暗槓又多些糊,打岀比人食糊的才要比錢,又有糊尾可數,碰岀有番的番子如中發白,就照乘,我學野都算幾叻,講解完睇完可以記到,不過我唔鍾意人賭,我成日叫人唔好賭,十赌九騙古有明訓,又見到好多人在賭牌九,即用打天九的牌開8門,每門4隻,又有扒番攤,即馬交赌場入門買2/3個種,唐人就是好賭,辛苦賺來的血汗錢輸晒,唐人多是做小生意,如雜貨店,修理鐘錶店,耕田種菜,餐館飲食,旅店等,好多人輸到成世都冇錢返唐山.


係吳氐宗親總會斜對面有兩間戲院雙連在一起,叫 Cine double 剛好做李小龍的猛龍過江,年前我在香港已看過,佢地現在才上演,遲咗香港二年多,朋友的女友又帶咗另外一位靓女一齊睇,仲話介紹比我,好似怕我唔想留在多明尼加,朋友預早搵人買咗票,我都不知道自已是不是行桃花運,只知到有美女陪睇戲,睇過都要番睇啦,當日全院滿座,戲院一樣有票賣,不過是冇位坐,只可站立或坐在地上,咁都得 ?戲院又冇冷氣,只得幾把牛角風扇,又熱又焗人又多出到成身汗,睇睇下突然停電,噓声和媽声四起,又要等戲院開自己的發電機,睇到李小龍比壞人打時,個個老番大聲粗口鬧,當李小龍打壞人時,佢地又手足舞動瘋狂拍手掌,民智似乎尚未開發,都唔知好嬲定好笑.


香港有一位貪污探長叫藍剛,知到廉署會查佢,就潛逃來到多明尼加,呢個國家同香港英國都冇簽引渡條約,香港好多報章雜誌胡亂報導話佢在加拿大,又話在星架坡開製衣廠,實則在 Santo Domingo 一條叫2月27號街 27 de Febrero 開咗一間麵包店有中文和西班牙文寫的招牌叫''東方快車'' ''Oriente Expresso,'' 有日坐車經過時朋友話比我知,仲指比我睇呢間麵包店就是藍剛開的,佢一個星期來二至三次,我朋友見過他,華僑叫佢做剛叔,間店鋪面積不大,約三至四百呎左右,有幾位女店員.1989年他病死在多明尼加,香港有報章話他在星架坡比一女子下降頭,中了下咒語,中了咒語令佢老婆眼盲,佢本人週身病痛,我一向叫人唔好迷信,做人只要心正,怕乜鬼咒語,若果下咒語,能咒到美國核動力航空母艦沉落大西洋,我就不止信,更學亞叻條盲毛由沙田跪到沙頭角.

一個舊籌碼的故事 2

靓女網友美露迪話似係仲有下文,唉自從移民澳洲後,都有成20多年冇寫中英文咯,最近呢2年,學吓人寫博,不過寫的多是簡簡單單,因執筆忘字,靈感又冇,要我寫幾千字真係唔容易,而且寫旅遊,大把人寫得好,如美露迪,行路人,蛇哥,露霸等等,所以要寫些特別的經歷和見聞.


多明尼加共和國曾入選世界十大渡蜜月勝地,若果純是旅遊渡假確是好地方,但謀生真的是不容昜,因貧富懸殊,工作機會不多,人工又低,好多贫窮家的小朋友十歲八歲就挽住擦鞋箱在街上問人擦唔擦鞋,有次我着住波鞋,有位小朋友問我''先生要唔要擦鞋''?Senor  limpia Zapata ? 大佬呀我着的不是皮鞋,是波鞋,点擦呢 ?佢話用清水幫我抹,同擦皮鞋價一樣一毫美金,好吧抹就抹,但我心裡非常不舒服,發達國家強迫教育,边有幾歲唔番學做擦鞋童,政府無能,又能說甚么呢?



朋友又帶我去馬場,亦是我呢生人第一次入馬場,香港的快活谷馬場經過好多次,冇入過,而且我唔鍾意賭,當時仲未有沙田馬場,呢個馬場真係好细,只得一條直路,终点冇電眼判决,兩邊每边有一條木柱,只得一人做裁判,佢老哥話邊隻嬴就邊隻嬴,舉起個牌有號碼個隻就算嬴,唔服都冇得上訴,唔講大家亦唔知,一眼望去見到好多騎師,原來全部都是細佬仔,大概只有11至13歲左右,個個都冇鞭唔使打, 馬瘦毛長真肉酸,個看台同香港做大戲的戲台差不多,坐的座位是一條过的木板,投注處就只得二個窗口.



本來是停留十天,加拉加斯 Caracas 二十天,但朋友的女朋友介紹咗一位鬼妹比我認識,她的老祖宗是西班牙人,混咗本土印第安人,優生學來講血缘越遠越好,近親繁殖低 B 的多,所以多國盛產美女,她每天下班後就來我朋友家帶我去玩,又教我西班牙文,十天話咁快就到,要去把機票延期十天,加拉加斯就住少十天就算啦.多國女多男少,比例至少三比一,加上熱帶地方女仔比較早熟熱情,西班牙文caliente 可解熱,熱情,但天氣熱就要用另外一個字 calor,而且她又教埋我跳舞,識咗唔夠一個星期,佢話要帶我返佢屋企坐下,唔係呀,咁快就見家長 ?我同朋友講,佢話我見識少,呢度帶返屋企好閒,咪同佢老豆老母吹下水咯,我問初次去帶乜嘢好 ?朋友說帶枝紅牌威士忌啦,我話或者佢地唔飲呢,佢話一百個多明尼加老番或者有一個似我唔飲威士忌,個晚去到,佢老豆二話不說就拿枝土炮霖酒出來,倒咗一大杯比我,我冇飲不过佢老豆幫我飲埋.

一個舊籌碼的故事

搵舊郵票時無意中搵到呢個舊籌碼,都唔知從何說起,有些黑白和彩色的照片都留在香港,依家寫的都是回憶,想到乜就寫,行路人在她的 blog講,申請中美洲七國的旅遊簽証要本人親自到台灣辦理,又要這又要那,她要去的七國其中一個巴拿馬我去過,呢 d 三,四流落後國家,無生產力,幾乎靠借渡日,還要如此對待港人.

想起1976年5月我本來計劃到南美委內瑞拉探我大伯父和唐大佬,順便看看環境,剛好多明尼加有一好友,佢老豆72年叫他移民多國,佢老豆經營一間小五金店,話要交比他打理,他三番四次寫信给我叫我去玩,仲話放心啦包食包住,好啦既然如此就買了汎美機票順便停多明尼加然後到加拉加斯,準備停多明尼加十天左右,當日從香港先飛関島,火奴鲁鲁,三藩市,纽約住一晚第三日早上才搭機到多明尼加,由紐約飛约四個小時,飛機才停,第一次就見到機上的多明尼加人大拍手掌,落飛機後冇巴士接載,要自提行李步行到機場閘口,下午天氣非常炎熱而且又晒,一陣間巳經出咗一身大汗,心想呢個國家真係非常落後,朋友包咗一部車來接我,一出機場個條公路叫美洲公路,是冇耐前同世界發展銀行借錢起的,一望就見到加勒比海,藍天白雲,風光如畫,大約每行一公里左右,就有一條燈柱上邊掛有圓形的中南美洲國家徽號,若果冇記錯總共有26個.

 晚上在一間中餐廳吃完飯後,朋友帶我去呢間赌場,是在Jaraqua酒店內,這是我呢生人第一次入賭場,朋友告訴我呢間舊酒店已經拆佐,現在的是十幾年前從新建做,朋友比咗幾個五元披索的籌碼给我,叫我玩21點,當時官價一美元兌一披索,我冇下注,走時將籌碼交還給他,只留下呢個即相片中的一個作為纪念,賭場有幾位年輕貌美的女侍應,拿住香煙和细枝荘的啤酒Presidente 問我要唔要,香煙同香港的不同,是10枝莊叫Montecarlo,我冇吸煙和飲啤酒的習惯,所以冇要,賭場內見到好多唐人赌錢,注碼很大,多是從香港,台灣移民來的,移民來此非常簡單,只要有錢就乜都得,賭場另外一邊有歌唱表演,又有舞跳,鬼妹非常熱情,有些更主動前來搵你跳,你唔識唔緊要,佢地會教你,跳的舞叫 meranque.

第二天朋友帶我和二個鬼妹一齊去加勒比海的一個海灘叫 Boca Chica 遊水,這亦是我呢生第一次和鬼妹在如此靓的海灘遊水,朋友冇車,要包一部車,即好似香港的計程車,不过車都是又殘又舊又冇冷氣兼冇咪錶,討價還價的講好價錢就開車,個海灘遠遠有用石頭圍起的壩,水最深都浸不过人頭,水清沙幼,鬼妹又教我西班牙文,因我識些德文,加上我的記憶力唔錯,好似好容昜就識講,好容易就溝通到.當天晚上回朋友家吃飯,剛吃就停電,朋友拿出一盞火水灯点着吃,這亦是我呢生第一次点着火水燈摸黑吃晚飯,電風扇冇電不能開,出到一身汗,又比蚊咬苦不堪言,我唔講或者你唔知,直到今天為止,每天還是間中停電,間中停水.

有一天我朋友要去碼頭提貨,因有一批货從香港寄船到佐,我和他一齊去,我們早上九時到咗碼頭,首先去一窗口排隊買一份表,排咗大約十幾分鐘,個份表一式三份,有四張 A 4紙咁大,然後到大堂,一眼望去幾十張寫字枱,每張枱前都有人排隊,人頭湧湧,拿住份表和提貨單到呢張枱排隊申報乜野货,填好後職員蓋一個印簽個名,又去第二張枱排隊講乜野價,個位職員跟住又蓋印簽名,跟住又排隊到另外一張枱,個位好似高级些職員的蓋印簽名,前前後後差不多十多廾個人簽名和蓋印,個張提货單蓋印到花斑斑似世界地图,提二箱货就搅咗一日,据講如此多人蓋章簽名,可以妨止漏税,又可以供多些就業職位喎真係  no eyes see la.

中菜

大前日港股大插四舊幾,尋日同今日反彈,我真係好彩,因股票期權拆倉時間剛剛好,有些少斬獲,所以又再請我洛杉磯來這裡玩的朋友吃晚飯,算他們有食神.

燒鴨半隻

薑葱貴妃蟹生麵底

枝竹羊腩煲

班腩豆腐煲

蒜蓉豆苗

蠶豆收成

今日下午出花園把四個幾月前種的蠶豆收割,有成2.95公斤,咁多都唔知點食,只好送些比朋友.

6月播種

 

 

 

郵票

舊的郵票搵唔到,反而搵到一些整張的郵票

1993年返香港玩時買的,英女皇登基四十週年紀念票

澳洲香港首次聯合發行的端午節郵票三套之一,下面是二和三

香港郵政署全息明信片第一套

 

 

全息明信片第二套

 

舊鈔票

原本想搵些舊郵票,點知搵來搵去都搵唔到,反而搵到一些舊鈔票.

我想一分,五分,十分的纸鈔票用过的人都很少很少,但我少年時就用过,因我幫老豆去交電費時找回來的,

 

舊飲食世界雜誌

原本想搵些舊郵票出來,點知搵到一本20多年前訂閱的飲食世界雜誌,和幾本教人煮食的舊書,記得初移民時,在香港訂佐二本雜誌,一本旅遊雜誌,一本飲食世界,滄桑多變,不單止呢兩本雜誌都摺埋好耐,飲食世界內裡賣廣告的餐廳,差不多全部都摺埋,但其中有一篇飲食的文章講杭州,山外山,天外天,樓外樓, 又使我想起一位我最敬佩的網友''行路人''講起她在杭州天外天吃的''松子魚'',不过作者冇去过天外天和樓外樓,他講天外天,樓外樓前年才復業,(我估計時間大概28年前左右)他們六人只去山外山,行路人講所謂食家,冇介紹过松子魚亦可能冇吃过,唉香港出名的食家,我只能用四個字去形容他們''不知所謂''.

 

 

 

海外的中餐

網友路霸兄留言,講起外國的中餐,唔好吃的多,這也難怪,有好多地方都好難買到中菜的調味料,我去大約六十幾個國家,去到一定要搵中餐試下,個人覺得歐洲倫敦的中餐最好,美國纽約和三藩市亦好.去年我跟康泰團到印度,吃佐兩餐中餐,一餐在孟買,一餐在新德里,相片中的金陵酒家是在孟買,吃佐乜唔記得,只記得飲佐一碗豆腐青菜蛋花湯,個位老闆仲同我傾好耐,全團加埋领隊連我一家四口總共16人,但他只同我傾,因我識講幾句印度 Hindi ,佢仲送佐一杯可樂比我,可能人结人缘,或者是我喜歡吹水,他是土生華人,幾年前去过香港廟街購物,兼大讚香港多美食.

 

三十多年前去過中美洲加勒比海的幾個國家,去過多朋尼加共和國首都聖多明哥的一間中餐廳叫''華亭'',印像特別深刻是有二件事,一是門外有副中式木對聯,因我比較留心对聯''華堂上獻蟠桃酒,亭臺樓阁第一家''第二件是我去洗手間時經过厨房,看見一位黑人厨師在炒菜抛鑊,功架十足,但味道丕到麻麻地,唔知係咪见到黑人廚師炒菜,心理上的作用覺得 d 菜唔多似中菜.

 

 

搵笨的中餐

昨天朋友夫妻二人從美國洛杉磯來我這裡玩二個多星期,接了他們機後,我們去一間中餐廳吃晚飯,算是幫他們洗塵,幾年前我們一家去美國玩時,他請过我們飲茶,吃晚飯,又借他女兒的車比我用佐幾天.

這餐廳以前從未去過,因我老妻睇到門外贴出肉蟹大特價,每磅$19.80不如入內試下,叫佐兩隻重5磅半,點知埋單時收$28.80一磅,原來門外特價是單蟹鉗,而我們吃的是雙蟹鉗,咁都得.仲有我出櫃面埋單時,比信用咭,個位收銀小姐同我講,對唔住二個月前開始唔收信用咭,因餐錢收得平喎,門外信用咭的標記忘記拆下,盛惠$275.50 就是下面的幾樣菜,咁都話的餐收得平?好彩我銀包剛有280元,否則要周圍去搵錢埋單.


薑葱肉蟹生麵底

 

清蒸鮑魚仔半打

羅漢齊,义燒燒肉拼盤

玉子豆腐

鸳鸯炒飯

朋友送的花旗参糖

舊車票

見到網友 Stella 姐,post 出舊車票,使我想起我都有收藏一些舊車票,本來還有些舊郵票,不過一時之間唔知放在邊度,搵唔到出來.九龍巴士的車票,最少有四十多年,九龍巴士公司依家都唔知有冇保存?,少年時我住灣仔,因我有一次坐渡輪過海後,搭九巴去竹園探我外婆,只要一毫子車费,來回二毫,下面有張红色的 KMB 車票是二毫,我收集的車票是因號碼得意,記得時當時巴士仲有售票員兼拉閘.

九龍巴士車票正面

九龍巴士車票背面

中華巴士

香港電車