園藝種植

1998



呢棵我最愛,開的花是粉紅色,開花期好長,年頭到年尾都有花,不過都瘦弱好多



第一幅相片用木盆種的那一盆,

第一幅相片用红色瓦盆種的仙人掌,因愈長愈高移到外邊

二盆最高的叫玉樹 ,也因愈種愈大,也要移出外邊

君子蘭太大棵,一盆變為三盆

最近放工後忙整理前後花園,施肥和修剪,剪下剪下原來修剪咗十幾公斤枯枝和樹葉,裝滿五大袋,加上有幾位朋友快從香港來這裡過年,順便執拾和打掃一下家裡的雜物,將唔要的舊衣服打包捐去比人,都唔知點解時間日日都唔夠用.

君子蘭因為太大,將它一開為三,其它的蘭花也是一開二,君子蘭都種咗十幾年,買回來時如手掌般大,已經換過幾次盆,每年都開花,多是兩朵最多四朵,花是橙黃色,開得算幾靚.圖片上呢幅地是我家車房後的空地,我搵人燒焊做咗一個三百多呎的鐵棚,旁邊的木欄是我自己加上去和油上綠漆,以前互聯網冇咁普及,多些時間種植,依家感覺自己懶咗好多,時間真係過得好快,眨下眼又十多年,門都爛掉好耐,都懶得整個新的門.

種蘋果

去年九月蘋果樹開花

今個星期拍的

蘋果樹開的花是粉紅色,真係好靓,想起差不多四十年前第一次去台灣玩時,大街小巷都聽到楊燕唱的一首歌叫蘋果花,後來傳到香港,跟著有好多台灣歌星來香港登台,仲帶動幾位歌星紅極一時.當年去台灣玩時認識一位台灣仔,他帶他姐姐出來玩時又認識他的姐姐,前前後後去過幾次台灣,一直到今天我們還保持聯絡,歲月流轉,轉眼四十年,當年因我有一位中學同學留學台灣,讀台灣大學海洋生物系,呢位台灣仔是台大農業系,當時好奇怪,我咁差的普通話竟然可以和他們溝通,也有可能他們聽得懂廣東話.


想起他的姐姐又使我想起一件事,記得大約九年前左右,她在電話中跟我說,好快就來墨爾本舉行婚禮,嚇得我一跳,叫我去移民局幫她拿一份申請居留的表格寄給她,她到了墨爾本後住在市中心的一間酒店,我和老妻去酒店找她,然後帶她來我家坐,我問她點解你唔住你未婚夫的家?她說她未婚夫話房間未打掃好喎,叫她暫住酒店幾天,第二天晚上她叫我載她去見她的未婚夫,去到後才知道他的未婚夫是一位猶太人在 Glenferrie road 經營一間婚紗店,我從未認識和交往過猶太人,過幾天後台灣妹同我說她要回台灣啦,因呢位猶太佬要她把台灣的房子賣掉,然後在墨爾本買一間房子加上他的名字,才肯舉行結婚典婚,我問她認識呢位猶太佬多久?她說才幾個月,他到台湾採購婚纱時朋友介绍認識,她回墨爾本後時常打電話給她细訴情話,唉台灣妹當時都年過半百,又不是情場新丁,連猶太人是全世界最聰明的人也不知,感情真假也分不出,又能怪誰?


蘋果樹是不能自家授粉,所以要種植兩棵以上,每年修剪枯枝和施肥,結果後噴些殺蟲劑,我多用醋開水當作天然殺蟲劑,既慳錢又唔怕污染.

種梨

去年九月啤梨樹開花



去年十二月中拍的

呢張照片是今日下午拍的

種梨,想起蒲松齡聊齋誌異內的一篇故事,講有一穿爛衫的窮道士,見有小販賣的高價梨又香又甜,於是乞求呢位賣梨者施捨一個梨,小販不肯,道士又唔肯走,小販大罵,道士講你成車梨幾百個,我只想乞一個,對你冇乜太大损失,你嬲乜?旁觀的人都勸小販不如揀個爛的梨比呢位道士,不過小販點都唔肯,旁邊店鋪有一位伙記睇見咁嘈,就自己用錢買咗一個梨比呢位道士,道士話我大把梨,班友奇怪,點解大把梨還乞求人要一個,道士話只不個想用呢粒核做種籽,跟住在地上挖個洞,把吃完的核埋在土裡,叫人用熱水淋,跟著長出一棵梨樹,跟著又開花結果,成棵樹長滿又香又甜的梨子,然後摘下送給所有人,小販後來發覺原來道士送给人的梨子是自已的.


若果我係呢位小販,肯定唔會有成車梨唔見哂的事情發生,因為我的性格一定會施捨一個給呢位穿爛衫的窮道士. 我呢棵梨樹都種咗十幾廾年,每年都有二/三十個啤梨,味道清甜,多汁,有時又用來加瘦肉煲湯.梨樹開的花是白色的,真係好靚,所以有人說一樹梨花壓海棠,梨樹唔同蘋果樹,梨樹可以自行授粉,種一棵就可以開花结果,蘋果樹就唔可以自己授粉,所以要種二棵以上.

種南瓜

有十多種疏菜植物,我只看它們發芽的葉就能分別出是甚麼植物,呢棵可能之前剩下的南瓜種籽,也可能是雀鳥啄食後留下糞便,剛剛發芽後千萬不要移植,等出多幾片真葉後才移植,否則一定瓜得

呢幾個是前年種的,去年冇種,不能年年種同一樣的植物,因連作會有病害蟲寄生在泥土上.
 

南瓜是一種非常易種的植物,兼且營養豐富可預防糖尿病, 降低血糖,因南瓜含有豐富的鈷,能促進人体的新陳代謝,造血功能,据說能消除致癌物質,有防癌功效.台灣,美國,加拿大等國家都有舉辦鬥種大南瓜的比赛,有的大到幾百斤,我睇過台灣一單新闻訪問一位得獎者,他說參赛者千方百計鬥種大,只不過是拿來參赛,瓜是唔會好食的,瓜肉又鞋又冇瓜味,我想是真的,種到咁大個瓜,乜都老哂,仲邊有營養和味道.

種南瓜要有大的地方比它們向外爬,瓜藤愈爬愈遠,通常先開的是公花,遲二個星期左右雌花才開,因唔同時間開花,如果週圍見唔到蟻和蜜蜂,就要幫它們人工授粉,南瓜基本上冇乜病害蟲侵襲,加上皮厚,唔怕雀鳥啄食,又可以擺放一段長時間,鬼佬西餐多是加鹽,胡椒粉焗熟做伴菜即 roast pumpkin ,切粒焗熟跟其它菜做沙律即 pumpkin salad 也有做南瓜蓉 mash pumpkin 亦有用來做湯 pumpkin soup 而我就最喜歡拿來打南瓜湯.

種盧筍

今年是第二年,開始見到好多條蘆筍

前兩日的東方日報

盧筍可以說是粗生易種的植物,既耐熱又耐寒,基本上唔使點樣打理,只要間中施肥,十多年前種過一次,因初學種第二年收割完後就連就根剷起,唔知道完全成長後每年都可以收割,呢度大造時,真係好平每公斤三至四元,經濟效益不大,見有種子剩下丟掉可惜,拿來再試種.

昨天我一位朋友剛從香港旅行回來,他帶咗一袋茶葉和一份東方日報给我,睇到財經版講瑞郎風暴,港股怕黑,恐未震完,上星期五插完二百幾點,今日最多插六百,升跌見惯,此心悠然,最慘是滿倉三/四/五缐垃圾股的師奶盲毛,今日對佢地來說,算是爆出小型股災,老表股市插得仲傷,大跌差不多8% , 創七年內單日最大跌幅,其實都冇乜值得奇怪,因老表股市唔成熟,人為升跌,加上贪污做假 no eyes see la.


以前我有一篇博文講蘆筍  http://ngwai.blogspot.com.au/2013/10/asparagus.html

沙漠玫瑰

放在室内種咗都有年幾,等到快開花時搬出室外,因室外陽光較多

本來開兩朵花,不過時間不同

 

個多月前,在旁邊剪一枝插在另外一花盆繁植, 成功

 

今晚(1月16日）夜期期指即時串流報價

都有好耐冇寫園藝種植,今日寫的是叫沙漠玫瑰  Dessert Rose 學名 Adenium Obesum原產於非洲沙漠,所以又叫做沙漠玫瑰,上個星期我 what's app 開花的圖片比我香港的一班朋友們睇,大約send 咗比十幾人,叫他們估下呢盆是甚麼花?可惜冇一個人估中,冇辦法啦香港人生活太緊張,地少人多,邊有時間去種花種菜,呢種花根本上好粗生,夏天一個多星期淋一次水,冬天兩至三個星期淋一次,幾個月施一次肥就掂,沙漠性的植物,本性習慣乾旱,成日淋水,想它唔瓜都幾難咯.

尋晚咪姐在我的 facebook 留言,問我咁夜都未睡,因為若我開咗期指期權倉的話,通常要睇埋期指夜市,顺便睇埋美股,我一向都睡得好少,花在股票和園藝種植的時間仲多,想起師奶盲毛叫我得閒種花,自己唔識炒牛熊仲勸人唔好炒,睇我留言就知我投資水平有限,覺得好攪笑喎,我問佢地點樣炒,串流報價月费多少?佢地話港交所有免費即時報價,唉咁樣去同股市大鱷博奕,都唔知好嬲定好笑.

幾箱法律舊書

國際商業法

頂級鍚蘭红茶

防偽雷射標簽

今天又想起以前認識的一位年齡28歲朋友,我依家幾乎再冇廾多歲年青的朋友了,他是斯里蘭卡人,來這裡一間大學叫 Deakin University 讀法律系,呢間大學都不錯,認識他也有二年多,因他以前每逢星期五,六,晚上五時後,就到我朋友做廚師的日本餐館做洗碗清潔雜工,直至晚上十一時左右收工,每次見他時他,他都笑容滿臉,記得有次晚上十時後我去探我朋友,朋友叫我等他收工後一齊去飲嘢吹水,而我就順便問呢位斯里蘭卡仔去唔去飲嘢?好呀,他真爽快一口就認承,若果係靓女就好啦,我們就一起到附近的唐餐廳吃嘢吹水,之後我送他回家.其實都唔係好順路,要開多廾分鐘車,之後都一齊飲過幾次嘢.


大約2006年頭,有一日他打電話给我,話有二件事唔知我可唔可以幫他?我說甚麼事,睇下我能力做唔做得到,他說他要回斯里蘭卡,他和他的女朋友都不獲移民局批學生居留的延期,因他們都冇上學好耐,可能功課追不上,他有幾箱舊書要暫時放在我處,而他亦不夠錢買二張機票,要我借幾百元給他們買回 Colombo的機票,我說好的,我就去他家幇他搬了此五箱書回來放在我家的雜物房,等他有機會回來時再取回.


唔記得幾耐,好似過咗一年多,有一日有人打電話給我,話斯里蘭卡有位朋友託佢帶一罐茶葉和幾百澳元還给我,我幾乎忘記咗有呢件事,見到呢位斯里蘭卡仔說,我的朋友现在在可倫坡當差,給了他的電話比我.有次我打電話给他講起仲有呢幾箱舊書如何處理?他叫我丟掉算啦,我打去圖書館話有書要捐,圖書館問我乜書?我話法律的舊書,圖書館不要,我又去書局問,有二手法律舊書賣要唔要?他們又話不要,只要中學的二手舊書,我想法律的書隨時代步筏,不停修改,丟掉又浪費,唔丟掉又冇用,法律舊書唔同歷史舊書,歷史書放幾耐都得,因冇可能修改,不過日本仔就不同,因為只有日本仔最喜歡刪改歷史.