種瓜

20天前南瓜前面有一冬瓜已發芽

15天前南瓜兩枝藤蔓開始生長

7天前南瓜滕蔓愈來愈長,中間的冬瓜也長大了一些

南瓜滕蔓又長些,今天早上我把冬瓜移植到另外一邊

今天見南瓜已經開花,是公花先開

冬瓜今年種了三棵

南瓜我每年都有種,不過都不是我自己播種,可能是雀鳥啄食後,糞便連種籽遺留下,同番茄一樣,每年都有一棵南瓜,一至二棵蕃茄,南瓜基本上好粗生,成長後又不怕雀鳥啄食,因為皮又厚又硬,有本事就啄啦,而且又冇乜病害蟲侵襲,不過最麻煩就是要有地方比它攀爬,有時爬到三米幾咁遠,每棵南瓜大約有三至四個瓜,種得好可能多些,香港好少人種南瓜,可能冇地方,花旗佬每年都有種南瓜鬥大的比賽,有些成百斤,都唔知點樣種到咁大? 初初生長的南瓜不要施太多肥,否則只會見藤蔓愈爬愈長,而不見開花.


冬瓜我有好多年冇種,剛好個多月前朋友比佐一個自家種的冬瓜給我,吃完後順手將種籽丟到田上,今個月初見到發了芽,冬瓜生長比南瓜慢好多,但冬瓜同南瓜一樣,也是要有地方比它攀爬,一棵同体有公花雌花,公花先開,我朋友種冬瓜最拿手,屋後塊田甚麼都不種,每年獨沽一味冬瓜,細瓜多就當節瓜食,鬼佬話每年唔好在同一塊地種同樣野,話會有連作障礙,有病害喎,不過他種了20多年冬瓜從未見有乜病害,中國以農立國,中國人種植技術源遠流長,識種瓜果蔬菜時鬼佬還是生番未開化.

泰國餐



一位泰國餐的侍應教我泰文"小姐你好靚"讀法是"烏蠅水沫沫"

今次返香港次天,朋友從西環開車到大埔載我們去九龍城吃泰國菜,吃泰國菜點解要去九龍城,朋友說九龍城的泰國菜是最道地正宗,我好少吃泰國菜,只知冬陰公湯和青咖哩,吃完泰國菜後他帶我兩公婆去附近一間家庭式泰式古法按摩,冇招牌全是靠熟人介紹,要預早打話預約,我老妻最喜歡按摩推拿,按摩推拿多一個叫法就是懶人做運動喎.

想起泰國餐又使我想起一件陳年往事,大約37至38年前我和我老媽兩妹參加香港的一間叫百樂旅行社泰國五天團,當時團費一千二百多元算是全港最平,五天行程食住都不錯,參加完後都感到滿意,價錢經濟口啤不錯加上報章推介,出發的團團皆滿,大約過了一年左右,我妹問我要不要去台灣?她和幾位朋友去報名參加百樂旅行社的台灣環島八天團,我說唔去啦,台灣我已去過,真係非常不幸,臨出發前幾天,呢間百樂旅行社突然關門大吉,東主自行失蹤,好多團友受影響,已報名的團友無法成行不止,而取回自己的護照人龍,更由金鐘排到去灣仔,成為當日報章頭條新聞,當時香港還未有旅行社牌照登記和賠償基金,無良奸商處心積慮,收夠錢就執笠走人.

香港國際美酒展

酒展免費入場券

入門口查票時,每張券送一隻酒杯,然後自己持杯到參展商的攤位,用呢個杯叫他們倒酒給你試

我家收藏一些酒,最多是紅酒,有幾枝是白酒和日本梅酒

試完後帶回來做紀念品,前後兩次總共四隻,好彩都冇打爛

剛才睇Stella 姐博文介绍灣仔新仙清湯腩,又想起當日過海去會展參觀酒展,之前曾在她的 facebook看過她介绍呢間清湯腩,既然一場來到灣仔而我老妻又話要吃 lunch,不如順路行去呢間試下咖哩牛腩.飯後步行去會展,酒展門票不用買,是我妹夫比我的,因他每年都幫襯一間酒行買二/三箱紅酒自家飲用,所以酒行每年都寄幾張入場券給他,若果自己拔炮買門票,盛惠每位一百港元,送水晶酒杯一隻,酒杯刻有香港國際美酒展的幾個字.

今次見參觀酒展的人不算太多,因今次酒展主要的參展商是意大利,意大利產的紅白酒名氣不及法國/西班牙,我冇乜認識,只知一隻最出名叫 Cinzano的酒,廾多年前去意大利玩時曾飲過,當時意大利南部的城鎮還有午睡的習慣,大約下午二點多關門到三點多,若果你水土不服拉肚子,想去藥店買止瀉藥,對唔住啦幫你唔到,只有等他們午睡醒後開門再來買,意大利話我只識兩句, 鄉里早晨PAISANO BUONGIORNO, 我的天呀 MA MA MIA 就係呢兩句.

婚宴

剛去華娃兄的網誌溜覽,見他博文介紹東莞鳳崗的婚慶文化博覽園,真係巧合剛好我朋友來我家坐,他給了我一張閤府統請的结婚請帖,原來他的女兒下個月21日出嫁,隨帖還付上一張美心餅家的餅咭,可當12澳元使用,呢間美心同香港的唔同,因為墨爾本呢間好多年前已先註册用呢個商標,香港美心集團以前可能冇想到拓展澳洲,冇預早申請専利註册,依家只能眼光光,餅咭用"美滿良缘鴛鸯壁合,心同連理鸞鳳和嗚"只改香港美心些少,因太耐我唔係好記得香港美心,因收過幾張,大概是"美滿良缘諧好合,心同連理並蒂蓮"最記得是超群餅咭,因我妹结婚時是用超群餅咭,我仲幫手派帖派餅咭 "超等良缘情永固,群賀新侶樂齊眉".

我認識呢位朋友時,他的女兒只有幾歲大,歲月流轉原來她今年已經29年華,大約六年前有次我見到她問她,亜妹拍拖未呀?她說讀緊大學,冇時間拍,去年三月我老媽從香港來,我見到她時又再問她,她說未呀,她的爸媽同我講有些擔心,怕她嫁唔出喎,點知冇見她還未夠一年就结婚,眾裡尋他千百度,驀然回首,那人卻在墨爾本,在此祝福他們同心永结.

http://ngwai.blogspot.com.au/2015/03/blog-post_21.html

飲茶

今天中午我一位好友請我們一家人去飲茶,呢間酒樓中文名叫全聚德英文叫 Taipan 離我家50多公里,開車足足一粒鐘,我好想唔去,他叫我一定要去,話好耐冇見我,既然咁講,去就去啦,呢間酒樓我已經有好多年冇去過,開車去揾來搵去搵唔到,明明是同一地方,轉來轉去都搵唔到,打電話問朋友,朋友話忘記同我講新名字叫東館,原來三個月前賣盤比一位老表,仲改埋名叫東館,呢個名都唔知似乜?以前生意非常好,週末飲茶排隊登記等位要分三輪,第一輪上午十一時至十二時半,第二輪十二時半至一時半,第三輪一時半至三時,不過依家生意差好多,今日都不用再分幾多輪,仲見到好多張空枱,有機會等執笠。

呢間以前飲茶以點心靚出名,佢老哥頂回來後,全部人換哂,包括樓面廚房,我試過一碟牛肉,味道不太好,我問朋友點解人家生意咁好,花咁多錢頂回來後要改名?點解要換哂全部員工,既不知道來的客人是生客還是熟客如何溝通,而且點心質素又差.朋友話世事好多是無法解釋的.

日本餐

最近呢幾年返香港玩時每年都有跟Stella 姐搵食,大前年湾仔家常便飯,前年麗斯卡爾頓,去年就是呢間七福神日本餐廳,今次約了一位舊同學去吃晚飯,每年返香港也有約他出來吃飯吹水,前年本來約他在旺角吃日本餐,因為剛開始佔中的關係,旺角擠滿人,後改去大埔道東盧大廈的中央.他說好耐冇吃日本餐,對上一次在香港吃日本餐也是和他一起吃,已是很多年前的事了,我對日本餐一向冇乜喜愛,感覺又貴又冇镬氣,只係擺得靚些,但依家香港的日本餐廳普及,價錢亦大眾化,到處都有日本餐廳,呢間價錢亦不貴,兩人吃咁多樣野,連啤酒一支,埋單港幣三百元有找.

以前有一年他寫信給我,問我幾時返香港?想約我结伴同遊四川,信內附有一首他作的打油詩"我本無根一浪人,隨風順水若浮雲,無憂無慮又無愁,五湖四海任我遊"同年我返香港後就和他一起從廣州坐飛機到昆明,他持有回鄉証坐國內航機政府當國內同胞有補助,而我是持有外國護照,當作外國人貴他的機票差不多6倍,我們坐成昆鐵路到峨嵋站下車,先上峨嵋山,後去樂山大佛,然後遊黃龍,九寨溝,最後成都坐火車到重慶搭三峽船到武漢,整個旅程大約三十天,旅途中認識兩位港女,回港後約過她們出來吃過二次晚飯,不用請她們,是AA制,兩位港女都是家住在柴灣,每次吃飯都是在灣仔區,我回來後幾次返香港也有約她們出來吃飯,後來兩位港女结婚嫁人,一位又搬家,而另外一位又移民加拿大,都已經失去聯絡.

大麻

大麻

大棵是南瓜,细少的是冬瓜

堆肥箱,廚餘可做堆肥,如菜葉,瓜果皮,不要放肉,因會招惹老鼠

今早出花園淋水堆肥時,忽然想起個多月前,後面屋的鬼仔問我有冇吸食過大麻,我說冇呀,連大麻是點樣的都未見過,他叫我伸手掌出來,放兩粒大麻在我掌心,感覺好輕,拍完照片後交還給他,澳洲每個洲的法例都不同,墨爾本屬維多利亜洲,法例規定攜帶不超過50克,比警察拉到也不算刑事罪行,頂多罰款,再嚴重就如成龍個衰仔祖明一樣,捉去強制戒除毒癮.呢個鬼仔初初搬來時,佢老豆老母帶他出外散步時,走路還含住奶咀,轉眼十幾年後剛剛成人,唉雖然是貪玩,不過好學唔學,學人吸大麻.

現時全世界有幾個國家可合法使用大麻,荷蘭阿姆斯特丹更有一間大麻博物館,可供遊客購買大麻,而網上亦見有種籽出售的公司,墨爾本以前時常睇到警察破獲在家種植大麻的新聞,少則一/二百株,多則有幾百株,大麻算是粗生的植物,只要有基本水耕 Hydroponic 常識就種得到,更不用特別肥料,因為種植不合法,只能在室内偷偷種植,因室內光源不足,焗住要用日光燈照射,水又要時常更換,變佐水電消耗量異常,咪差佬追查到咯.依家的差佬更使用直昇機用熱能探測追蹤,所以近年都冇乜聽到破獲室內種植大麻的新闻.

馬交遊

當日早上蓮香樓飲完茶之後,步行前去港澳碼頭會合其它幾位朋友一同搭船去馬交,今年總共九人,到馬交後先參觀一間新開的賭場,好似叫新濠,開了幾個月左右,見賭場賭客不多,正式是有刀客冇路客,睇完後去官也街一間貼滿食神梁文韜照片做廣告的魚翅麵家吃碗魚翅麵和炸魚球,跟著去試下瓦煲咖啡和葡撻,跟著去一間叫金龍的賭場,呢間賭場是我第一次聽到,也是第一次入內,睹場有三層,不過每層面積都不大,前幾日睇到一單新闻講馬交一間叫希臘神話的賭場執笠,自從習總上台打壓貪官,加上最近幾年世界經濟不好,澳門的賭場己冇乜生意,獨沽一味靠賭維生,而且馬交政府缺乏遠見,乜都唔撹話之佢,每年照派錢,愈派愈多,一葉知秋,馬交市民捱苦的日子快來了.

一行九人只有我一人不賭,每次都是我一個人漫步街頭,其實呢幾年都是一樣,每次想去漁人碼頭也沒有去成,怕時間不夠,因不知道他們賭多久,今次吃晚飯的地方亦是同前年的一樣,黑沙環林記燒烤,記得大前年去時坐滿人,今次只有我們一檯人,生意真的差了很多,每次返香港回來後我都要減肥,馬交一天遊九個人之中有五個是肥人,由早上吃到晚上,如此吃法有乜辦法唔變肥人呢.

http://ngwai.blogspot.com.au/2014/10/blog-post_27.html