越式晚餐

越式蝦仁沙律菜

酸湯魚,湯底加呢些菜25元,魚是時價和大小另外計算,我揀一條盲曹要加50元

越式蓋魚即香港人叫炆魚

椒鹽軟殼蟹

饟豆腐

尋晚帶我老媽去吃越式晚餐,其實我老媽唔鍾意出街吃飯,不過我老妻,仔女就相反,最鍾意出街吃飯,因為唔使煮又唔使洗碗,餐廳的食物好吃最大原因,就是有鑊氣和加上味精.呢間中越式餐廳叫"光榮"名字都唔知好聽或唔好聽,離我家不遠,車程十分鐘左右,十幾年前是一間纯中式餐廳叫"富貴樓"轉過好多次手,可惜都是執笠收場,直到前幾年轉手比一位越南女仕,生意就做起,地方加大好多,因頂埋旁邊和後面的店舖,週末更要排隊等位.

呢間"光榮"餐廳的一位越南華僑大佬廚師我認識,不過冇乜交往,見面只有點頭,他的名字叫亜日,因身材肥胖,行家都叫他做肥佬日,而我就叫他做日哥,他十幾年前在另外一個區的一間中越餐廳當廚師,而呢間算是我們飯堂,我和老妻一個星期光顧有四至五次,吃到待應個位亜姐都好熟,過年時都比利是我仔女,他好多時候站在門外抽煙,見得多就點頭打下招呼,有次他跟我說做埋呢個月唔撈啦,我問點解?佢話自己開檔,比佐個地址給我,叫我得閒去捧場,開張幾日後剛好我有朋友從香港來,就帶他們去吃,朋友都說唔錯,他開的店就是在依家靠近"光榮"的另外一條街,唔知點解?手藝和廚功好都冇用,就係冇生意,唔夠一年就摺埋,而他就轉到"光榮"一直做到今天.

韓國行




韓國我都去過好多次,第一次去最少也是30年前,當時還有 curfew ,第二次也是20多年前,最記得是去華克山莊的賭場要買入場門票,當時韓國人完全唔準進入,外國人每位要付好似2000或2500韓圜,門票可以當籌碼投注,嬴佐賭埸就收回門票,比個現金籌碼給你,當晚是我一生人第一次親眼見到一靴百家樂牌連開四十多口莊,連一鋪閒都冇開,只有幾舖和,見到有人坳頸唔信邪,仲鬥氣買閒,又見到好多人怕,唔敢去買莊,不過我唔賭,若果我賭一定跟買莊,買到長莊開穿為止.今次跟的團亦有帶團友去賭場,呢間賭場位於市區,叫 seven luck ,未進場前每人派幾千韓圜泥碼.

好多網友都感到奇怪,為甚麼我有這麼多的錢去旅行?可以講比大家知,大部份都是在香港股市賺來的,因香港股市未成熟投資者多,想搵快錢者多,盲毛更多,盲毛仲話我虚言浮誇遊歷過幾十個國家,大概是厕所,唉連我講的野真假都分不清,只盲目擦鞋盡信博主,日日炒出炒入,組合中個股賺些少就沽,蝕本就持有,組合變成劣股驅逐良股,若果班盲毛去炒期指期權,瓜得仲快,呢個多星期港股大升,我又賺夠我一家人去旅行的洗費,各位若想要在股市賺大錢,第一要有獨立思考,不要人云亦云,第二要有持貨的恆心和毅力,千淘萬瀝雖辛苦,寒沙吹盡始見金.

本來想一口氣寫哂我帶我仔女去過的十幾個國家,因為我母親和我外甥女下個星期來我這裡玩個多星期,我老媽今年81歲多,身體算壯健,佢上次來已是六年前,她信天主信了五十多年,去過二十幾個國家,以色列去過兩次,可惜我一次都未去過,以色列呢個地方我好想去.我要帶佢地去玩,吃喝購物,可能冇乜時間再寫,一停又冇靈感,又唔想寫.

新西蘭行

新西蘭我前後去過三次,第一次是自己一個人去,第二次和老妻自駕遊,另外一次帶同小兒去,小兒約十個月大,我想網友Shu 兄一看照片就知道這是新西蘭甚麼地方,我以前一直以為這裡是個湖,後來 Shu 兄講比我知是海,因為新西蘭素以湖光山色吸引遊人,使我有個錯覺以為是湖,呢次一家三口去新西蘭幾天,住在我朋友家,又可慳番一些酒店錢.


朋友好似90初年由香港移民新西蘭,佢話想起64就怕怕,佢老兄在香港一間美資化工公司做高級 sales,行行企企月入幾皮,佢老婆亦是專業人仕,夫妻在香港算是非常高收入人仕,又無兒無女,本來可以剩好多錢,但他不聽我的忠告,一意孤行,硬要移民出外闖,想創出一番新天地,可嘆夫妻二人在新西蘭都找不到理想的工作,只能打臨時時薪散工.


當初佢老哥計畫開一間小型化工廠,可惜搵來搵去都搵不到廠房,更不要說牌照,新西蘭環保條例極嚴格,政府又廉潔,不同其它落後國家,财可通神,用錢銀可攪掂,你鍾意間廠開係邊就開係邊,你鍾意將廢料倒去邊就倒去邊.時光流逝,心灰意冷豪情壯志盡付煙雲,兜兜轉轉浪費幾年光陰和半生積蓄後回流香港,又搵唔番以前份筍工,最陰公移民前平價賣樓,回流後又嫌貴,只租不買,話等樓價跌才買,不過等到頸都長哂,樓價不止還未見跌更狂升,前年我返香港玩時,曾去過他在西環租住的一層樓睇下,實用面積大約四百多呎二房一廳,月租盛惠一萬三千多元,我都唔知貴定唔平?

臺灣行










台湾我都唔記得自己去過幾多次,冇十次都有八次,第一次去台灣因我有中學舊同學在台灣大學讀書,畢業時叫我去台灣玩幾天,住在他租的房,他讀的是冷門課程,海洋生物系,畢業後在台灣找不到工做,返香港後也找不到一份正職,只靠打散工維生,有時幇人補習,有時又在報章寫稿,最後有人介紹他在報章寫馬經,老實說他的貼士準繩度同擲毫冇乜分別,若講賭馬智識有可能我叻過佢,告東尼老豆告魯士騎馬的業餘時代我都有留心,佢同我講若果寫唔準,咪改用第二個筆名咯,同依家網上财經博客,講股佬一樣,分分鐘改名換姓,正式是信一成,雙目失明,信六成,楂兜乞食,我成日勸人唔好信講股佬,要獨立思考,唔好炒槓桿,冇人聽我之笛還比人插,可惜到他們感覺我的說話是對的時候,他們都付出沉痛代價.


當年我在台灣時,朋友介紹一位台灣仔比我認識,是他台灣大學的一位校友,呢位台灣仔讀的是農業化學系,當時台灣大學本土生是要經大學聯招考試,能入讀臺大的都是精英中的精英,我的普通話一向好普通,不過唔知點解他又聽得明白,記得當日他問我在香港那一間大學讀?我說暫時未讀大學,將來可能會讀,也有可能不會讀,不過直到今天為止還未讀,所以也慳番唔少學費去旅行嘆美食.酒逢知己千杯少,話不投機半句多,同他好多野傾,第二天晚上他又帶他家姐出來一齊吃飯吹水,他家姐是在一家醫院任職化驗員,大家可能年青人,都算投缘傾極倾唔完.



好似過了二至三年後,我第二次到台灣,台灣仔因身在台南的農場打工,叫他父親即最尾相片中帶帽的那位世伯,帶我去基隆一天遊,晚上又帶我去吃日本餐,因他父親在日本仔統治時期讀日文書,能寫和講日文,呢餐是我咁大個仔第一次吃日本餐,可能唔識食,總覺得唔係咁好食,呢餐是他父親搶住埋單,哦原來差不多已是卅年前的事了,第二天早上台灣仔的家姐台灣妹又帶我去前電影明星胡錦開的春風得意樓飲港式早茶.


台灣妹情路多波折,尋尋覓覓廾多載也找不到如意郎君,幾年前她打電話給我,話終於搵到啦,此君一表人才,是猶太人,剛好也是住在墨爾本,經營婚纱店,她就快前來我這裡辦结婚喜事,叫我去移民局拿一份表格寄給她,我都替她感到開心高興,千呎絲蘿終有託,可惜猶太佬講金不講心,話怕她利用他辦居留,要她先買房子加上他老兄的名字後才肯訂情,最後又玩完得個桔.

埃及行

我們一家去埃及旅行是跟康泰團,大約是八年多前,此團留给我好多回憶,因為全團小朋友只有小兒和小女,年齡最細是小女,團友中有兩對夫妻和一對姐妹都冇小朋友,他們都特別喜歡小女,沿途他們跟小女玩,團友中又有一位剛退休亜叔,單獨參團,小兒每天跟他聊天問長問短,而我老妻又跟其中一位單身女性團友吹水,我一個人悠然自得在尼羅河遊船上睇書,本來帶佐一部手提電腦,以為旅途中可以上網睇下財經和股價,點知埃及比想像中更落後,沿途包括酒店在內都冇 wifi 冇得上網.


康泰旅行社服務算唔錯,團友中有一位女仕和小女生日,只相差一日,康泰都有送上生日蛋糕,我跟過香港的幾間旅行社就欠奉,仲有兩餐中餐,埃及有中餐吃真係好,雖然味道冇香港咁正,不過尚可接受,講真的埃及餐真的不敢恭維,我妹在香港買佐好多零食和杯麺比我,在旅途中给小兒小女吃,臨玩完回香港的前一天,其中有一位女團友叫我讓一杯給她做早餐,因她帶來的都吃光,我就送一杯給她,後來我老妻講比我知,她前後來過埃及三次,在稅局任職主任,年過四十還是雲英未嫁,仲問有冇未结婚男性介紹給她?她在將軍澳有自置物業,條件比她低的她想也不想,條件好過她的,又不會要她,正是低不成高不就,加上她的樣貌又不太漂亮,都幾難搵咯,唉人生好多事情都是無奈的.

美國行

秋葉阿姨說她以前也帶過兩歲小朋友去旅行,也使我想起帶小朋友去旅行的事,美國我前後去過三次,第一次是卅多年前去多明尼加玩的時候,在紐約轉機時停了幾天,第二次是廾多年前和朋友去,第三次差不多十年前和我老妻小兒小女去,自從有了小朋友後每次外遊都跟旅行團,飲食住宿有人安排,方便好多,呢次是自由行,因我三藩市的朋友一定要我住在他家,否則不要找他,既然如此,恭敬不如從命,又可慳些食宿費用,想起他一家從香港移民三藩市搭機的那一天,我開車去太古城載他們去機場,原來一轉眼快卅年,他兒子结婚後搬出,有房空出來,不過他家遠離市區,要坐巴士到火車站再轉火車才可到南三藩市站.

老美自從911恐襲後,我一家在三藩市機場入境過移民局時,要打手指模,先打左手手指公,再打其它四隻手指,然後右手一樣,最後拍番一張玉照存檔,大人小童一律看待,出境時過安檢更要脱鞋,用金屬探测器掃描全身,非常麻煩,以前兩次去都冇要打手指摸和拍照.


在他家住了一個多星期,他幇我買了四張唐人經營的長途巴士車票,由三藩市到洛杉磯,車票多少錢不知道,他就是不肯收車票錢,又請我們飲茶食飯,變佐又食又拎,真係唔好意思,唐人經營的旅遊巴士當然冇灰狗咁正,不過勝在有一個叉燒飯盒和一枝蒸溜水免費贈送,同埋車上有中文電影睇,當日播的是梁朝偉做的色戒,但我冇睇,在車上搵周公好得多.

睇屋

屋前的花園

走廊寬闊

開車十多分鐘有一個商場

我鬼佬行船朋友尋日下午帶我去看他已交了訂金的一間屋,屋地總面積大約三千八百多呎,四房兩廰,開放式廚房,冇後花園,下個月交吉,間二手屋屋齡六年,離市中心30公里左右,港幣三球多些,他今年51歲,銀行只肯做14年期的借貸,首期要四成,他每月的薪金還少過我,但他在比利時布魯塞爾有間屋,在這裡的一間已供滿,上個月換新車,前幾日又買呢間屋,他有些地方和我相似,如炒股票,不煙洒,不賭,佢只靠打工和投資,能夠儲蓄到買幾間屋,都算有本事,不過最大原因是冇家庭冇小朋友.


此人一向自視甚高,只佩服叻過佢的人,佢成日話我叻過佢,唉我都唔知自已有乜叻?不過有些時間都覺得自已叻過佢,他在布魯塞爾有間屋,我在香港亦有一間,他每年去一次旅行,我都係每年去一次旅行,不過他只買一張机票,而我就要買四張,而且我仔女跟我去過十幾個國家,顺便擦下自已鞋.


墨爾本的房價中位數,十多年來升了二倍多,不過工資就追不上,通漲蠶食哂購買力,不過好彩澳洲有税務優惠首次置業人仕,而且法例规定非居民不能購買二手樓,否则大量土豪老表湧來,不問價係咁炒,炒到天價為止,咁就慘啦,香港政府出好多辣招都不能控制樓價狂升,最大原因是錢多話事.